وزیراعظم عمران خان نا کماشی ٹی آزاد جموں و کشمیر اٹی حکومتی اصلاحات نا بابت دیوان

اسلام آباد۔ 20 اگست (اے پی پی) آزاد کشمیر حکومت نا کنڈآن اقتصادی شونداری و روزگار نا فراوانی، غذائی رکھ، سروس ڈیلیوری نا گچینی، ادارہ جاتی اصلاحات و کانود نا بالادستی کن لائحہ عمل اس ٹہیفنگا۔ وزیراعظم عمران خان نا کماشی ٹی آزاد جموں و کشمیر اٹی حکومتی اصلاحات نا بابت دیوان اٹی وزیر کشمیر امور و گلگت بلتستان علی امین گنڈاپور، وزیراعظم آزاد کشمیر سردار عبدالقیوم نیازی، چیف سیکرٹری آزاد کشمیر و تعلقدار بڑزکو آفیسر آک ساڑی ئسر۔ دیوان ءِ پاننگاکہ آزاد کشمیر اٹی بھلو کچ اسے آ اصلاحات کن لائحہ عمل اس تیار ءِ ہرادے اِرامرحلہ غاتے ٹی نافذ کننگک، اولیکو ریسہ ٹی شش تُو انا مد اٹی شار تیٹی سفائی ستھرائی نا نظام نا بحالی، جو تا سفائی و اوفتیا تجاوزات آتا چٹفنگ اوار ءِ۔ پین تعلیم و جان جوڑی نا بشخ اٹی اصلاحات، بنداوی پنجر نا بحالی و جوڑ جاڑ، بجلی و ساف دیر انا ساڑی آ نظام نا بحالی اوار ءِ۔ ہندا لائحہ عمل نا ہفتہ وار ڈٹ بندی ءِ کرسا عملدرآمد ءِ معینہ مد اٹی پک کننگک۔ ارٹ میکو ریسہ ٹی مریس مدتی اصلاحات اوار ءِ۔ اقتصادی شونداری و روزگار نا فراوانی کن صنعتی شونداری، کاروبار اٹی آسانی ودی کننگ و سیل و سوات نا مون آ دننگ کن گام گیج کننگک۔ دیوان ءِ مستی معلومدار کننگاکہ غذائی رکھ اکن لائیو اسٹاک، فلوری کلچر، ہارٹی کلچر و کچن گارڈننگ ءِ مون آ دننگک۔ داکان بیدس نیم گڈلو ڈٹ آتا زوت پوروی، پوسکن آ ٹیکنالوجی نا کمک اٹ جان جوڑی و تعلیم نا بشخ آتا مانیٹرنگ، بجلی نا ساڑی آ نظام اٹی گچینی، خراج نا نظام نا اصلاحات و کانود نا بالادستی کن گام گیج ہم لائحہ عمل نا بشخ اسے۔ وزیراعظم عمران خان کانود نا بالادستی نا اہمیت آ زور شاغسا پارے کہ آسودہی ریاست آتے ٹی ہزگارو نیزگار کن کانود اسہ وڑ مریک۔ مستی پارے کہ سیل وسوات نا مون آ دننگ کن اسہ جامع حکمت عملی اس جوڑ کرسا داڑآ زوت عملدرآمد ءِ پک کننگ انگ ءِ۔