اوغانستان آ طالبان تا کنٹرول امریکی و پاکستانی حکومت آتے کن اواری اٹ کاریم کننگ نا موقع اس فراوان کرینے، پاکستانی سفیر اسدمجید خان نا امریکی جریدہ ءِ انٹرویو

اسلام آباد۔ 20اگست (اے پی پی) امریکہ ٹی پاکستان نا سفیر اسد مجید خان پارینے کہ اوغانستان آ طالبان تا کنٹرول امریکہ و پاکستان ءِ موقع اس فراوان کرینے کہ او شک و شبہ غاتا چاگڑد نا جاگہ غا مربوط وڑاٹ اواری اٹ کاریم کیر۔ پنی آ امریکی میگزین،”فارن پالیسی“ ءِ انٹرویو ترسا سفیر پارے کہ او داہیت آ یخین تخک کہ داسہ دہشت گردی ءِ توننگ اٹ پاکستان، امریکہ، چین و روس انا خیال آک اسہ وڑ ءُ۔ اوپارے کہ ای سرپند مریوہ کہ گچین ہیت دادے کہ اوغانستان نا بابت امریکہ و اوغانستان نا نیام اٹ پورو وڑاٹ امنائی ءِ۔ وخت اس کہ امریکی وزیر خارجہ انٹونی بلنکن و وزیر خارجہ شاہ محمود قریشی نا نیام اٹ داچرجوئی ٹی سرجم گپ وتران مسنے۔ اوپارے کہ امریکہ خواہک کہ اوغانستان اٹی غٹ فریق آتا نیام اٹ افہام و تفہیم مرے، نن ہم خوانہ، امریکہ خواہک کہ بیدادی کم مرے، نن ہم ہندا خوانہ۔ امریکہ خواہک کہ مستین نا بھرم تا رکھ مرے، نن ہم ہندا خوانہ، دہشت گردی نا بارواٹ چین، روس اتون اوار نن غٹ فریشان اُن۔ امریکہ ٹی پاکستانی سفیر داتاثر ءِ مسترد کرے کہ پاکستان کابل نا کنڈآ پیش گامی ٹی طالبان تا ہچ ءُ کمک اس کتو۔ اوغانستان اٹی پیش بروک آ واقعہ غاتیا سخت نظر شاغنگ آن داوڑنا تاثر آتا غلط مننگ ظاہرمریک۔ اسد مجید اسہ پین سوج اسے نا ورندی ٹی پارے کہ نن مدام اوغانستان اٹی پورو وڑاٹ امن عمل نا بحالی ٹی کمک کرینن و آخبت ہم کرسا کینہ۔انت طالبان تا غٹ سرکڑدہ غاک پاکستان آن پیشن ءُ؟ نا بارواٹ اسہ سوج اسے آ اوپارے کہ ای بیرہ دا چاوہ کہ طالبان تا سرکڑدہ دوحہ غان اوغانستا ن آ منتقل مسنے۔ پاکستان نا گڑتی تا بارواٹ گپ وتران کرسا اوپارے کہ نن اسہ جامع حکومت اسے نا خواہندار اُن و ہندا اومیت کینہ کہ اسہ جامع امن عمل نا کمک اٹ داوڑنا حکومت اس جوڑ مریک۔ اوپارے کہ اوغانستان نا تازہ حالیت آتا گڑاس اثرہم ارے ولے نن ہر او ممکن کوشست کننگ اُن ہراکہ کننگ کینہ و داٹی پین ودکی کننگک۔ ودکی ”ٹرائیکا“(امریکہ، پاکستان، چین و روس) انا 10و 11اگست آ دوحہ ٹی اسہ جوان ءُ اوڑدہی اس مسنے و نن غٹ پڑک آتا نمائندگی نا حامل اہم شریدار آتون رابطہ ٹی اُن۔