وزیراعظم عمران خان نا الیکٹرانک وونٹنگ مشین نا کاریم اٹ اتنگ نا بابت آگاہی مہم اس مرتب کننگ نا پارت

اسلام آباد۔ 20اگست (اے پی پی) وزیراعظم عمران خان الیکٹرانک وونٹنگ مشین نا کاریم اٹ اتنگ نا بابت آگاہی مہم اس مرتب کننگ نا پارت جاری کرے تانکہ الس و غٹ شریدار آتے داعمل نا فائدہ غاتیان معلومدار کننگ مرے۔ او جمعہ نادے آ گچین کاری تیٹی الیکٹرانک وونٹنگ مشین نا کاریم اٹ اتنگ نا بابت جاچ دیوان نا کماشی ءِ کریکہ۔ وزیراعظم میڈیا آفس نارداٹ دیوان اٹی بنجائی وزیر چوہدری فواد حسین، شبلی فراز، سلاہکار وزیراعظم پارلیمانی امور ڈاکٹر بابر اعوان، خصوصی کمکار ڈاکٹر شہباز گل و نادرا، وزارت سائنس و ٹیکنالوجی نا سینئر آفیسر آک بشخ ہلکر۔ دیوان اٹی وزیراعظم ءِ الیکٹرانک وونٹنگ مشین تا کاریم اٹ اتنگ نا بابتجوڈیشل کمیشن نا سلاہ ئی کانودی ترمیم آتیان معلومدار کننگا۔ دا گام گیج آتا مسخت گچین کاری تا عمل ءِ شفاف جوڑ کننگ ءِ۔ وزیراعظم دا رداٹ آگاہی مہم اس مرتب کننگ نا پارت جاری کرے تانکہ الس و غٹ شریدار آتے داعمل نا فائدہ غاتیان معلومدار کننگ مرے و بے سوب تنقید ناحقائق آتون جاچ اس پیش کننگ مرے۔