جہانی برادری اوغان تا راجی آسراتی و زرگزرانی کمکاری کن تینا کڑد ءِ ادا کے، وزیر خارجہ مخدوم شاہ محمود قریشی

اسلام آباد۔ 20اگست (اے پی پی) وزیرخارجہ مخدوم شاہ محمود قریشی پارینے کہ جہانی برادری اوغان تا راجی آسراتی و زرگزرانی کمکاری کن تینا کڑد ءِ اداکے۔ دفترخارجہ نا رداٹ وزیرخارجہ شاہ محمود قریشی جمعہ نادے آ ڈنمارک نا تینا ہم منصب جیب کوفوڈ تون ٹیل فون آ رابطہ کرے۔ ہڑتوم آ وزیر خارجہ غاتا نیام اٹ اوغانستان نا ساڑی آ حالیت آتیا سرجم گپ وتران مس۔ وزیرخارجہ پارے کہ ساڑی آ دے تیٹی، اوغانستان نا حالیت آتیا وزیراعظم عمران خان و ڈنمارک نا وزیر اعظم میٹے فیڈرکسن نا نیام اٹ سرجم گپ وتران مس۔ شاہ محمود قریشی پارے کہ پاکستان، اوغانستان شاری تا پیش تمنگ نا چرجوئی ٹی ڈنمارک حکومت نا ہروڑاٹ کمک ءِ کننگ ءِ۔ پرامن و سوگو اوغانستان، نئے بیرہ پاکستان کن بلکن مچ آ ڈیہہ کن بے کچ اہمیت تخک۔ شاہ محمود قریشی پارے کہ دنیا، اوغانستان اٹی پورو ڑاٹ بدل مروک راستکی تا ادراک تخک۔ داحالیت آتے ٹی المی ءِ کہ اوغان شاری تا سیکورٹی و اوفتا حق انا رکھ ءِ پک کننگے۔ اوپارے کہ اوغانستان اٹی دیرپا امن و سوگوی نا دوئی کننگ کن اجتماعیت آ مبنی سیاسی تصفیہ، مون آ ہِننگ نا گچین کسر پک مننگ کیک۔ وزیرخارجہ جہانی برادری آ زور شاغا کہ او اوغان تا راجی آسراتی و زرگزرانی کمکاری کن تینا کڑد ءِ ادا کے۔ ڈنمارک نا وزیر خارجہ جیب کوفوڈ، اوغانستان آن ڈینش شاری تا پیش تمنگ نا بابت کمکاری نا ستاءِ کرسا وزیرخارجہ شاہ محمود قریشی و پاکستانی سرکڑدہ غاتا منت واری ءِ ہرفے۔ ہڑتوم آ وزیر خارجہ غاک تین پہ تینی است خواہی نا باندات آتیا سلابتی چرجوئی آ امنا کریر۔