وزیراعظم عمران خان نا ورناپولیس کارندہ کانسٹیبل جمال کلہوڑو ءِ اعزاز تننگ نا پڑو

اسلام آباد۔ 20اگست (اے پی پی) وزیراعظم عمران خان پلیٹ فارم آن لغوشت ہلسا تموک آ بندغ ءِ بچفوک آ ورنا پولیس کارندہ کانسٹیبل جمال کلہوڑو ءِ اعزاز تننگ نا پڑو کرینے۔ جمعہ نادے آ ٹویٹر آ جاری ٹویٹ اٹی وزیراعظم پارے کہ فرض انا لگن اٹ اداکننگ آ نن کانسٹیبل جمال کلہوڑو ءِ 23مارچ آ اعزاز تننگ نا فیصلہ ءِ کرینن۔ وزیراعظم عمران خان تینا ٹویٹ اٹی سورہ المائدہ نا اسہ آیت”ہراسٹ اسہ انسانی زند اس بچفے او گویا انسانیت ءِ بچفے“ نا ترجمہ ءِ ہم شیئر کرینے۔ یات سلے کہ اسہ دے مست تینا اسہ ٹویٹ اسے ٹی وزیراعظم اسہ ویڈیو کلپ اس شیئر کرے ہراٹی ہُننگ مریک کہ اسہ ورناپولیس کارندہ اس ریلوائی اسٹیشن آ تینا فرض ءِ سرترسا اختہ ئس ہراتم اسہ مسافر اس پلیٹ فارم آن لغوشست ہلسا تما تو ورناپولیس کارندہ ترندی اٹ ددینگسا ہندا بندغ ءِ ٹرین نا کیرغ اٹ بننگ آن بچفے۔ داڑآ وزیراعظم پارے کہ فرض ءِ سرتننگ بے کچ مقدس ءِ۔ اوالس نا خذمت اٹ اختہ ورناپولیس کارندہ نا جوزہ غاتا ستاءِ کرے۔