ملک اٹی پورو وڑاٹ بے کنڈ ہلوک، آجو و زموارانہ صحافت نا مون آ دننگ حکومت نا اولیت ءِ، وزیراعظم عمران خان

اسلام آباد۔ 20اگست(اے پی پی) وزیراعظم عمران خان پارینے کہ ملک اٹی پورو وڑاٹ بے کنڈ ہلوک، آجو و زموارانہ صحافت نا مون آ دننگ حکومت نا اولیت ءِ۔ داخیال آتا درشانی ءِ او اوغانستان اٹی ساڑی آ درملکی صحافی تا پیش تمنگ نا بابت کروک آ گام گیج آتے کن تینا کماشی ٹی دیوان اٹی گپ وتران کرسا کرے۔ دیوان اٹی وزیر حوالکاری چوہدری فواد حسین، وزیر مملکت حوالکاری فرخ حبیب، سیکرٹری حوالکاری و ایلو سینئر آفیسر آک بشخ ہلکر۔ وزیر حوالکاری وزیراعظم ءِ اوغانستان اٹی ساڑی صحافی تا پیش تمنگ نا بابت وزارت حوالکاری نا گام گیج آتا بابت حوال تس۔ درملکی صحافی تا پاکستان آ بننگ و اوفتے ویزہ تون اوار ایلو آسراتی تا فراوانی نا بابت باندات آتیا ہم سرجم حوال تس۔ وزیر حوالکاری پارے کہ اوغانستان نا حالیت آتا رداٹ صحافی تا آسراتی کن وزارت حوالکاری ٹی خصوصی سیل اس جوڑ کننگانے تانکہ ملوک آ درخواست آتیا دمدستی عملدرآمد ءِ پک کننگ مرے۔ وزیراعظم جہانی صحافی برادری نا آسراتی تا خاطر وزارت حوالکاری خاص وڑاٹ ایکسٹرنل پبلسٹی ونگ انا گام گیج آتا ستاءِ کرے و میڈیا نا بابت ایلو باندات آتیا ہم گپ وتران ہم کرے۔ دیوان اٹی گپ وتران کرسا وزیراعظم پارے کہ ملک اٹی پورو وڑاٹ بے کنڈ ہلوک، آجو و زموارانہ صحافت نا مون آ دننگ حکومت نا اولیت ءِ۔