اسلام آباد۔ 17اگست (اے پی پی) بنجائی وزیر داخلہ شیخ رشید احمد محرم الحرام اٹی کانود نافذ کروک آ ادارہ غاتے محرم الحرام اٹی سیکورٹی ءِ ہائی الرٹ کننگ نا پارت کرسا پارے کہ امن و ایمنی ءِ ہرحال اٹ پک کننگے و الس نا جان و مال انا خیال ءِ تخنگے۔ داخیال آتا درشانی ءِ او وزارت داخلہ ٹی محرم الحرام اٹی امن و ایمنی نا بابت تینا کماشی ٹی خصوصی دیوان اٹی گپ وتران کرسا کرے۔ دیوان اٹی کانود نافذ کروک آ ادارہ غاتا نمائندہ غاتون اوار بنجائی سیکرٹری داخلہ ئسک بشخ ہلکر۔ دیوان اٹی بنجائی دارالحکومت، ہرچار آ صوبہ، آزاد جموں و کشمیر و گلگت بلتستان اٹی امن و ایمنی نا حالیت آتا جاچ ءِ ہلنگا۔ دیوان اٹی عاشورہ ٹی امن و ایمنی ءِ برقرار تخنگ نا بابت تین پہ تینی سلابت اٹ حکمت عملی اس طے کننگا۔ امن وا یمنی نا حالیت آتا پدریسہ جاچ ءِ ہلنگ کن وزارت داخلہ ٹی خصوصی ءُ سیل اس جوڑ کننگانے۔ وزیر داخلہ پارے کہ خصوصی آ سیل عاشورہ ٹی 24گھنٹہ کاریم کرسا کیک۔ وزیر داخلہ کانود نافذ کروک آ ادارہ غاتے پارت کرے کہ محرم الحرام اٹی سیکورٹی ہائی الرٹ تخنگے۔ امن و ایمنی ءِ ہرحال اٹ پک کننگے۔ عاشور اٹی موبائل فون سروس ءِ بیرہ حسب ضرورت بند کننگے۔ اوپارے کہ الس نا جان مال انا خیال ءِ تخنگے و سیکورٹی گام گیج آن الس کن مشکل ودی کننگ آن پاناد کننگے۔ بنجائی حکومت صوبہ غاتے امن و ایمنی کن غٹ تیکنیکی و ایلو سپورٹ ءِ پک کیک۔ دیوان اٹی سیکرٹری داخلہ پارے کہ امن وا یمنی ءِ برقرار تخنگ کن انتظامیہ نا کمک کن سول آرمڈ فورس تعینات کننگانے۔ حساس علاقہ غاتا سیکورٹی کن کانود نافذ کروک آ ادارہ غاک خاص گام گیج کرینو۔
