ہم آہنگی نا سوگوی و مون آ دننگ کن وزارت مذہبی امور، امن کمیٹیک و غٹ تعلقدار ادارہ غاک اسہ ایلو تون رابطہ ٹی ءُ، علامہ طاہر اشرفی نا پشاور اٹی پریس کانفرنس

پشاور۔ 17اگست (اے پی پی) وزیراعظم نا خصوصی کمکار مذہبی ہم آہنگی علامہ طاہر اشرفی پارینے کہ پاکستان امن نا علمبردار ءِ، دا ڈیہہ خاص وڑاٹ اوغانستان اٹی امن کن پاکستان بھاز قربانی تسنے و داچرجوئی ٹی تینا مثبت و تعمیری کوشست آتے برجاتخک۔ او سے شنبے نادے آ پشاور اٹی پریس کانفرنس کریکہ، علامہ طاہر اشرفی اسہ سوج اسے نا ورندی ٹی پارے کہ اوغانستان نا ساڑی آ حالیت آتا بابت تعلقدار ادارہ غاک تین پہ تینی وڑاٹ رابطہ ٹی ءُ وخت اس کہ دابابت پاکستان جہانی برادری تون ہم رابطہ ٹی ءِ و ہندا ادارہ غاتا وساطت آن پاکستان نا موقف مون آ بننگ ءِ۔ علامہ طاہر اشرفی پارے کہ وزیراعظم 2009اٹی اوغانستان و داڈیہہ نا حالیت آتا بابت ہراموقف نا درشانی ءِ کریسس کہ ویل انا ایسر ہیت و گپ اٹ مننگ کیک، جنگ و جدل اٹ آخا داموقف ءِ داسہ مچ آ دنیا امنا کننگ ءِ۔ اوپارے کہ اوغانستان اٹی پاکستان امن نا کمکار نا کڑد ءِ ادا کرینے، داکڑد ءِ مچ آ دنیا امنا کننگ ءِ و داسہ دا اوغان سرکڑدہ غاتا زمواری ءِ کہ او پرامن وڑاٹ ہیت وگپ و افہام و تفہیم نا کمک اٹ تینا تہہ نا باندات آتے مون آ دے۔ اوپارے کہ پاکستان داعزم آ سلوک ءِ کہ پاکستان گل زمین کس اس نا برخلاف کاریم اٹ بفک، و پاکستان داہم خواہک کہ پین ملک اسے گل زمین ہم پاکستان نا برخلاف کاریم اٹ بف۔ علامہ طاہر اشرفی پارے کہ پاکستان نا دشمن واکدارک محرم الحرام نا دے تیٹی داڑے بدامنی تالان کننگ نا تاک اٹ سلرہ ولے الحمداللہ حکومت ادارہ و غٹ مسلک آتا عالم دین تا کمک اٹ محرم الحرام نا دے تیٹی مذہبی ہم آہنگی و امن و ایمنی نا فضابرقرار تخنگ اٹ سرسہبی دوئی مسنے۔