اسلام آباد۔ 16اگست (اے پی پی) وزیرخارجہ مخدوم شاہ محمود قریشی پارینے کہ ننا گڈیکو مسخت پرامن، متحد، جمہوری، سوگو و شونہال اوغانستان ءِ۔ داہیت ءِ او اوغان راہشون آتا ڈل اتون گپ وتران کرسا پارے ہرافک دوشنبے نادے آ اوڑتون وزارت خارجہ ٹی اوڑدہی کریر۔ اوڑدہی ٹی اوغانستان نا حالیت آتا بابت گپ وتران کننگا۔ شاہ محمود قریشی پارے کہ المی ءِ کہ نن اواری اٹ اوغانستان و ڈیہہ نا گچینی کن لائحہ عمل اس جوڑ کین۔ ننا گڈیکو مسخت پرامن، متحد، جمہوری، سوگو و شونہال اوغانستان ءِ۔ کنا سوگو اومیت ءِ کہ نن اواری اٹ امن و مفاہمت ءِ مون آ دننگ کینہ۔ جہانی برادری اوغانستان اٹی امن خواہک، اوغان سرکڑدہ غاتے کن المی ءِ کہ او دا تاریخی موقع نا فائدہ ہرفسا، اوغانستان نا وسیع البنداو و جامع سیاسی ایسر نا کسر ءِ آوار کیر، نن سرپند مرینہ کہ جامع مذاکرات، اوغان ویل انا پرامن سیاسی ایسر نا اسٹ انگا کسر ءِ۔ شاہ محمود قریشی پارے کہ نن خواپنہ کہ اوغانستان اٹی بدامنی مرے و تہہ نا بے چیٹی آن ہمسایہ ملک زہمی مرے۔ ننے امن مخالف ہمو زموار آتیا ہم سخت نظر تخوئی مریک ہرا پاکستان نا جہانی کہول آ امنا مروک خیرخواہی نا کڑد ءِ غلط ءُ رنگ اس تننگ نا کوشست آتے ٹی لگوک ءُ۔ اوغانستان نا گڈیکو مزل نا دوئی کننگ اٹ اوغان راج انا ہر تپہ اسہ وڑ اہمیت تخک، پاکستان، اوغانستان اٹی امن کن تینا تعمیری و خیرخواہی نا کڑد ءِ ادا کننگ کن سنبرینگوک ءِ۔
