اسلام آباد۔ 16اگست (اے پی پی) وزیراعظم نا سلاہکار واپار و زرکاری عبدالرزاق داؤد ملک اٹی بھلا صنعت آتا پیدوار اٹی نمان ودکی آ خوشی نا درشانی ءِ کرسا پارینے کہ صنعت آتے کن ساڑی حکومت نا دوستانہ و گچین پالیسی تا سوب آن ملک اٹ بھلا صنعت آتا پیدوار اٹی 16سال اٹی اولیکو وار بڑزکو ودکی ریکارڈ کننگانے۔ دوشنبے نادے آ تینا اسہ ٹویٹ اسے ٹی او پارے کہ اودے خوشی ءِ کہ مالی سال 2021ء ٹی ملک اٹی بھلا صنعت آتا پیدوار اٹی ودکی نا بڑزکو کچ ءِ۔ اوپارے کہ پاکستان اٹ صنعت آتا زبوں حالی نا دور چٹنگ ءِ و داغٹ ساڑی حکومت نا صنعت آتے کن دوستانہ و گچین پالیسی تا سوب آن ممکن مس۔ اوپارے کہ ٹیکسٹائل، فوڈ، بیوریجز، تمباکو، پٹرولیم، فارماسیوٹیکل، معدنیات، آٹوموبائل، فرٹیلائزرز و آئرن و اسٹیل مصنوعات آتا پیدوار اٹی ودکی مسنے۔ ملک اٹی بھلا صنعت آتا پیدوار اٹی تدوک آ مالی سال اٹی 14.85درسد نا نمان ودکی ریکارڈ کننگانے ہراڑآن کوویڈ۔ 19نا جہانی دین انا رداٹ اقتصادی بحالی و زرگزرانی نمو نا عکاسی مننگ ءِ۔ مئی 2021ء نا مقابلہ ٹی جون نا تُو اٹی ملک اٹی بھلا صنعت آتا پیدوار اٹی 4.36درسد نا کچ اٹ نمو ریکارڈ کننگانے وخت اس کہ جون 2020ء نا مقابلہ ٹی ملک اٹی بھلا صنعت آتا پیدوار اٹی 18.42درسد نا کچ اٹ نمو مسنے۔ حساب وکتاب نا رداٹ تدوک آ مالی سال اٹی پیوستہ مالی سال انا مقابلہ ٹی ٹیکسٹائل نا بشخ اٹی 3.98درسد، خور، شربت و تمباکو 2.38درسد، کوک و پٹرولیم مصنوعات 0.96درسد، فارما 1.01درسد، کیمیکلز 0.48درسد، غیر دھاتی معدنی منصوعات 3.31درسد، آٹو موبائل 2.17درسد، آئرن اینڈ اسٹیل 0.58درسد، کھد 0.47درسد و پیپر اینڈ بورڈ انا پیدوار اٹی 0.13درسد نا نمو ریکارڈ کننگانے۔
