اسلام آباد۔ 16اگست (اے پی پی) جہانی مالیاتی فنڈ پارینے کہ کوویڈ۔ 19نا دین آن زرگزرانی بحالی کن اینخو نا سال 2021ء نا ایسر اسکان ہر ملک انا 40درسد آبادی ءِ کورونا غان رکھ انا ویکسین خلنگ ناگرج ءِ وخت اس کہ 2022ء نا نیام اسکان ویکسین خلنگ نا کچ ءِ 60درسد اسکان ودفوئی مریک۔ آئی ایم ایف تینا اسہ رپورٹ اسے ٹی پارینے کہ اقتصادی بحالی نا جہانی ہدف آتا دوئی کننگ کن اینخو سال اٹی گرج آن زیات ویکسین تخوک آ ملک آتے کم آن کم ویکسین نا اسہ ارب ڈوز پدتموک و کم کٹیا والا ملک آتون شیئرکروئی مریک وخت اس کہ ویکسین تیار کروک آ ادارہ غاتے ہم کم و نیامی کٹیا والا ملک آتے ویکسین نا فراوانی ٹی ودکی کروئی مریک،۔ جہانی ادارہ مستی پارے کہ ویکسین نا وخت آ فراوانی کن گڑاس پابندی تا چٹفنگ آن بیدس پیدوار اٹی ودکی کن پین زرکاری نا ہم گرج ءِ۔
