اسلام آباد۔14اگست (اے پی پی):ملک ءِ توامیں ھند ءُ دمگ ءُ ڈن ملک ءَ نندوکیں پاکتانی سفرت جاہ آں آجوئی ءِ روچ جوش ءُ جزبگ ءَ گوں گوازینگ بوتگ ءُ ملک ءَ را اسلامی گہبودی مملکت ءِ جوڑ کنگ ءِ جزم ءِ ھم درشان کنگ بوتگ۔ شمبے 14 اگست 2021 ءِ روچ ءَ 75 ھپتاد ءُ پنچمی آجوئی روچ برجمینگ بوتگ۔ ایوان ءِ صدر ءَ بیرک ٹنگگ ءِ مراگش ءَ ابید سرکاری ءُ جندی پڑ ءَ مراگش ھم بست ءُ بند کنگ بوتگ ءُ زندمان ءَ جتا جتائیں پڑ آں گوں سیادی داروکیں مردم آں پاکستان ءَ گوں دلی واھگ ءُ دوستی ءِ درشان کتگ ءُ آجوئی ءِ جنز ءَ نمیرانیں ہیرو آناں توسیپ ءُ ستا پیش کتگ۔ روچ ءِ بندات ءَ مسیت ءُ گس آنی تہ ءَ ملک ءُ راج ءِ دیمروئی، سلامتی ءُ وشھالی ءِ واستہ ھاسیں دعا ءُ بنجاھی دارالحکومت ءَ 31 ءُ صوبائی دارالحکومت آنی تہ ءَ بیست ءُ یک ٹوپ جنگ ءُ سلامی دیگ بوتگ، مزار ءِ قائد اعظم ءُ مزار ءِ اقبال ءِ سر ءَ گارڈز آنی مٹ ءُ بدلی ءِ جوانیں مراگش ءِ بست ءُ بند کنگ بوتگ۔ مراگش ءَ چہ پیش سائرن جنگ بوتگ ءُ ھمک رنگیں ٹریفک ءَ را اوشتارینگ بوتگ۔ سرکاری ءُ پرائیویٹ ادارگ آنی تہ ءَ سینگاری لیٹ ءُ مرچُک آں گوں سینگارینگ بوتگ۔ ملک ءِ اندر ءُ ڈن ملک ءَ نندوکیں پاکستانی راج آں آجوئی ءِ روچ ءِ درگت ءَ گل ءُ شاتی ءِ گوما برجم داشتگ۔ ملک ءَ را اسلامی گہبودی مملکت ءِ جوڑ کنگ ءِ جزم ءِ ھم درشان کنگ بوتگ۔
