کوئٹہ۔ 13اگست (اے پی پی) انجمن تاجران آل بلوچستان نا دیوان اس جمعہ نادے آ صدر نصرالدین اچکزئی نا کماشی ٹی اڈ ہلک۔ دیوان اٹی کلیم اچکزئی، عبدالرشید اچکزئی، نصیر اللہ اچکزئی، زعفران اچکزئی، بدرالدین اچکزئی، کمال الدین کاکڑ، فضل خان کاکڑ، عین الدین کاکڑ، نظام الدین ترین، رحیم الدین اچکزئی سید صبور آغا، سید طارق آغا، سید عمر آغا، سید بسم اللہ آغا، سرور خان نیچاری و ایلوفک بشخ ہلکر۔ دیوان آن تران کرسا نصرالدین اچکزئی پارے کہ 14اگست قول ءِ پوسکنی نا دے ءِ اینو ننے قول کروئی مریک کہ نن تینا وطن ءِ پرامن، سرسہب زرگزران و اخوت و ایلمی چارگی تننگ کن اسہ ایلو نا کمکار و کوپہ مرسا مون آ کانہ، وطن عزیز نا جوڑ مننگ کن ہزار آ مسلمانک تینا جان تا قربانی ءِ تسر ننے اوفتا روح ءِ سکون تننگ کن پاکستان نا مسخت آتا خواست آتے پورو کننگ کن جہد کروئی مریک۔ اوپارے کہ پاکستان اسہ زیباءُ ملک اسے۔ اللہ تعالیٰ داملک ءِ غٹ نعمت آتے تسنے ننا غٹ انا بایدے کوشست مرے کہ نن داملک ءِ اونا مسخت آتا کنڈآ درسا کان۔ اوپارے کہ اینو نادے اواری اٹ دا قول کینہ کہ پاکستان ءِ شونداری نا بڑزی تسکان سرکننگ نا خاطر ہروڑنا قربانی ایتنہ۔ ننے ملک و قوم انا شونداری کن قائد نا پاروک آتے مون آتخسا خواری، دیانت، امانت، اخوت و ایلمی ءِ تینا شعار کروئی مریک۔ اوپارے کہ انجمن تاجران آل بلوچستان 14اگست ءِ شایان شان وڑاٹ اڈایتک۔