اسلام آباد۔ 13اگست (اے پی پی) قوم 75می یوم آزادی ءِ ہفتہ نادے آ ملی جم وجوش اٹ اڈ ایتک۔ یوم آزادی نا وخت آ ایوان صدر اٹی بیرک ءِ چست کننگ نا مرکزی دود اڈ ہلیک وخت اس کہ غٹ صوبائی دارالحکومت آتے ٹی ہم بیرک ءِ چست کننگ نا دود اڈتننگک۔ بنجائی دارالحکومت اٹی 31وخت اس کہ صوبائی دارالحکومت آتے ٹی 21,21توپ آتا سلامی تننگک۔ دادے انا رداٹ صدر وزیراعظم تون اوار اہم شخصیت آتا خصوصی کلہو جاری کننگک۔ قائد نا مزار و اقبال نا مزار آ گارڈز آتا بدلی نا دود ہم اڈتننگک۔ مچ آ دنیا ٹی پاکستانی سفارت خانہ غاتے ٹی یوم آزادی نا چرجوئی ٹی خصوصی دود اڈتننگک ہرافتے ٹی پاکستانی پردیسیک بشخ ہلیرہ۔ داہمودے ءِ ہراتم پاکستان 1947ء ٹی انگلستان آن آجوئی دوئی کرسا جوڑ مس۔ 14اگست نادے پاکستان اٹی سرکاری کہول آ قومی تہوار نا وڑاٹ بھاز جم و جوش اٹ اڈ تننگک۔ پاکستانی الس دادے آ تینا قومی بیرک ءِ فضاٹی بڑزکرسا تینا قومی محسن تے خراج عقیدت پیش کیک۔ پارلیمنٹ ہاؤس تون اوار مچ آ ملک انا اہم سرکاری ماڑی تیا بتی لگفنگک۔ دادودآتیان بیدس نئے بیرہ ایوان صدر و ایوان وزیراعظم تون اوار اہم ماڑی تیا قومی بیرک ءِ چست کننگک وخت اس کہ مچ آ ملک اٹی سرکاری و نیم سرکاری ماڑی تیا ہم سوز ہلالی بیرک ءِ پورو آب وتاب اٹ چست کننگک۔ یوم آزادی نا وخت آ پرنٹ میڈیا غا خاص اشاعت و الیکٹرانک میڈیا غا خصوصی پروگرام نشر وٹیلی کاسٹ کننگک۔ یوم آزادی نا وخت آ واہگہ بارڈرآ بیرک ءِ شیف کننگ نا رنگ رنگی آ دود ہم اڈتننگک۔ یوم آزادی نا چرجوئی ٹی تیاریک پورو مسنو۔ بنجائی دارالحکومت نا غٹ شاہراہ تیا قومی بیرک نا بہاکننگ کن اسٹال خلنگانے، ہراڑآن اسلام آباد اٹی پترینگ انگ تون ہرکنڈآ سوز ہلالی بیرک نا بہار نظر بننگ ءِ۔ ہنداوڑ مچ آ ملک اٹی غٹ چنکا بھلا شار تے ٹی جشن آزادی نا تیاریک ترند مسنو۔ پاکستان تون اوار اوار آزاد کشمیر نا بیرک ہم اسٹال آتیا ساڑی ءِ۔ اسلام آباد نا سی ڈی اے نا کنڈآن ہم قومی بیرک ءِ خلنگانے۔
