اسلام آباد۔ 13اگست (اے پی پی) وزیراعظم نا سلاہکار پارلیمانی امور ڈاکٹر بابر اعوان وزارت پارلیمانی امور ءِ ڈیجیٹلائز کننگ نا گرج آ زور شاغسا پارینے کہ وزیراعظم نا ڈیجیٹل پاکستان وژن نا رداٹ وزارت نا غٹ گنڈوک محکمہ غاتے ٹی ڈیجیٹلائزیشن نا عمل نا دمدستی وڑاٹ بناءِ کننگے۔ او جمعہ نادے آ وزارت پارلیمانی امور اٹی ڈیجیٹلائزیشن نا بابت اڈ ہلوک دیوان نا کماشی ءِ کریکہ۔ دیوان اٹی بنجائی سیکرٹری پارلیمانی امور، وزارت نا ملحقہ محکمہ غاتا آفیسر آک بشخ ہلکر۔ وزیراعظم نا سلاہکار پارلیمانی امور ڈاکٹر بابر اعوان پارے کہ وزیراعظم نا ڈیجیٹل پاکستان وژن آ وزارت پارلیمانی امور پبی وڑاٹ عملدرآمد کننگ ءِ و دارداٹ وزارت نا تہہ ٹی ڈیجیٹلائزیشن آ کاریم نا بناءِ کننگ انگ ءِ۔ اوپارے کہ انفارمیشن ٹیکنالوجی نا خواست آتون ہم گرنچ مننگ کن انقلابی پروگرام شین تننگ انگ ءِ۔ اوپارے کہ سرکاری ادارہ غاتا کاریم نا کچ ءِ ودفنگ کن اسہ مربوط ڈیٹا بیس اسے نا جوڑ کننگ نا سخت گرج ءِ۔ ای گورننس پلیٹ فارم آن سرکاری ادارہ غاتے گچین خذمت فراوان کننگ نا موقع دُو بریک۔ ڈاکٹر بابر اعوان پارے کہ ای گورننس آن امور کار اٹی آسراتی مریک و شفاف، جوابدہ و گچین وڑاٹ وزارت نا امور ءِ مون آ دننگ مریک۔ اوپارے کہ پوسکن آ آئی ٹی سلوشن تا کمک اٹ وزارت نا غٹ محکمہ غاتے ٹی ای گورننس ءِ مون آ دننگ نا گرج ءِ۔ ڈاکٹر بابر اعوان پارے کہ دنیا ڈیجیٹلائزیشن نا کنڈآ ہِننگ ءِ۔ آخبت ہنداناءِ، داڑآن شفافیت بریک۔ اوپارے کہ وزارت اٹی ڈیجیٹلائزیشن نا عمل آن وزارت نا غٹ امور پیپر لیس مریک ہراڑآن خڑچ آتا بچت تون اوار اوار وخت انا ہم بچت مریک۔
