اسلام آباد۔ 13اگست (اے پی پی) پارلیمانی کشمیر کمیٹی نا چیئرمین شہریار خان آفریدی پارینے کہ پاکستان نا آئین قرآن و سنت نا تابع ءِ، نن انسانی، ذاتی و ریاستی باندات آتے ٹی تذبذب نا گواچی اُن، جہانی سازش آتا مقابلہ ءِ کننگ کن ورناتے متحرک کروئی مریک۔ اوجمعہ نادے آ داڑے جہانی اسلامی یونیورسٹی ٹی دود آن تران کریکہ۔ اوپارے کہ پاکستان نا 65درسد آبادی ورناتیا تالان ءِ ہرافتیان بھلو گیشتری اسے تون سمارٹ فون انا آسراتی ساڑی ءِ۔ اسہ فعال ءُ راج اسے ولے پاکستان نا ورنا چین جہانی کہول آ تینا کڑد ءِ انت اکن ادا کپسہ۔ شاید اونا بنداوی سوب اوفتے تینا دا کڑد انا اہمیت نا اندازہ اف۔ شہریارآفریدی پارے کہ دنیا ٹی تینا کڑد و عمل اٹ ننے پک کروئی ءِ کہ سوز ہلالی بیرک تون تعلق اسہ اللہ و اسہ رسول آ ایمان تون وابستہ ءِ۔ اوپارے کہ نن انسانی، ذاتی و ریاستی باندات آتے ٹی تذبذب نا گواچی اُن۔ ننے تینا ورناتے جہانی سازش آتامقابلہ ءِ کننگ کن متحرک کروئی مریک۔ اوپارے کہ بھارت اٹ انسانی حق انا بھلا خلاف ورزی مننگءِ۔ کشمیر اٹ بھارت ظلم انا غٹ چم آتے کاریم اٹ اتنگ انگ ءِ۔ اوپارے کہ ننے یوم آزادی نا وخت آ داقول کروئی مریک کہ ننا ہر گام و مفاد دھرتی لمہ تون گنڈوک مرے۔ حرمین شریفین نا ہیت برے تو مچ آ پاکستانی قوم اللہ و اونا رسول ﷺ آ جان و مال اتون اوار غٹ ءِ قربان کننگ کن تیار مریک۔ ہندا ننا ایمان ءِ۔ اوپارے کہ اسلامی یونیورسٹی کلیدی کڑد تخوک ءُ ادارہ اسے ہرا سٹیٹس کو انا چٹفنگ، انتظامیہ ءِ پیپر لیس کننگ تون اوار اہم گام گیج کرینے۔
