اسلام آباد۔ 13اگست (اے پی پی) بنجائی وزیر حوالکاری و شینکاری چوہدری فواد حسین پارینے کہ کابل اٹی اسہ ہندن ءُ حکومت اسے نا خواہندار اُن ہراڑآ اوغانستان نا غٹ سیاسی جماعت آک و الس متفق مریر، نیٹو فوج انا پیش تمنگ آن پد اوغان فوج پنہ غاتیانبار تالان مسنے، اوغانستان نا حالیت آتا اثر پاکستان آ ہم تمک۔ اوغان سرکڑدہ غاتا میرات و خاہوت پیشن نا ملک آتے ٹی ءُ وخت اس کہ اوغان الس نیزگاری و مشکل آتے ٹی اختہ ءُ۔ پاکستان اوغان پناہ گزین چناتے اسکالر شپ تس، شش ہزار نا خڑک اوغان چناک داوخت آ پاکستان اٹی خواننگ ءُ۔ یونیورسٹی تا پوسکن آ ٹیکنالوجی ٹی اہم ءُ کڑد اسے، آئی ٹی و تعلیم نا سوب آن پاکستان نا آخبت ءِ روشنا کننگ ءِ، پاکستان تحریک انصاف نا حکومت قائد اعظم و علامہ اقبال نا نظریہ غاتیا مبنی پوسکن آ مسلم ریاست نا قیام کن کوشست کننگ ءِ، صوبہ و بنجاءِ تعلیم اٹ جدت کن اواری اٹ کاریم کروئی مریک۔ داخیال آتا درشانی ءِ او جمعہ نادے آ جہانی اسلامی یونیورسٹی نا کنڈآن ”پاکستان نا آخبت اٹ ورناتا کڑد“ انا سرحال آ اڈ ہلوک آ سیمینار آن تران کرسا کرے۔ بنجائی وزیر حوالکاری پارے کہ جہانی اسلامی یونیورسٹی نا پاکستان نا تعلیمی بشخ اٹی اسہ اہم ءُ کڑد اسے، دنیا ٹی ماڈرن یونیورسٹیک پوسکن آ تعلیم، صنعت و ٹیکنالوجی ءِ یکجا کرسا پوسکن آ زرگزران تا بنداو ءِ تخار۔ اسٹین فورڈ یونیورسٹی امریکہ ٹی 500ٹریلین ڈالر نا زرگزران ءِ بش کرے، گوگل، واٹس ایپ اسٹین فورڈ یونیورسٹی نا طالب علم آتا جوڑ کروک آ ایپ آک ءُ، یونیورسٹیک ہی اوفتے موقع تسر کہ او تینا ٹیکنالوجی ءِ کمرشلائز کیر۔ اوپارے کہ یونیورسٹیز، پوسکن آ ٹیکنالوجیز و کمرشلائزیشن نا تکون دنیا ءِ بدل کرینے۔ بنجائی وزیر حوالکاری پارے کہ وزارت تعلیم و وزارت سائنس پاکستان نا آخبت ءِ شونداری نا کنڈآ استوار کننگ ءِ۔ اوپارے کہ ہراتم نن پاکستان اٹ تینا سفر نا بناءِ کرین تو ننتون بیرہ اسہ یونیورسٹی اس ئس، اینو ملک اٹی 217یونیورسٹی ءُ۔ اوپارے کہ نن یونیورسٹی تیٹی آب اٹ تعلیم آ چکار کین، نن ہراتم یونیورسٹی نا بنداوءِ تخن تو ننے سمامرے کہ دا یونیورسٹی ملک انا شونداری کن کڑد ادا کیک۔ بنجائی وزیر حوالکاری پارے کہ صوبہ و بنجاءِ اواری اٹ تعلیم اٹ گچینی کن گام گیج کروئی مریک۔ اوپارے کہ فیصل آباد کشاری یونیورسٹی ٹی زبردست کاریم مننگ ءِ ولے ننا کشت وکشار فیصل آباد کشاری یونیورسٹی تون ہمووڑمربوط اف ہراوڑ مروئی ئسک۔ چوہدری فواد حسین پارے کہ ننے یونیورسٹی تا میکنزم ءِ گچین کننگ ناءِ۔
