اسلام آباد۔ 13اگست (اے پی پی) وزیر خارجہ مخدوم شاہ محمود قریشی پارینے کہ پاکستان اٹی دہشت گرد کارروائی تیٹی اوغان گل زمین ءِ کاریم اٹ اتنگ است ہسونی نا سوب ءِ۔ جمعہ نادے آ وزارت خارجہ ٹی سلابتی کونسل امور خارجہ دیوان نا کماشی ءِ کرسا وزیر خارجہ پارے کہ پاکستان، اوغانستان اٹی امن کن تینا خیرخواہی کوشست آتے برجاتخنگ کن سنبرینگوک ءِ۔ دیوان اٹی بنجائی وزیر ڈٹ بندی اسد عمر، بنجائی وزیر خزانہ شوکت ترین، سلاہکار واپار رزاق داؤد، وزیراعظم نا نمائندہ خصوصی اوغانستان ایمبیسیڈر محمد صادق، سیکرٹری خارجہ سہیل محمود، اسپیشل سیکرٹری رضابشر تارڑ، ماہرین امور خارجہ، مسکوہی خارجہ سیکرٹریک و سفیر آک و ایلو کونسل نا باسک آک بشخ ہلکر۔ دیوان اٹی اوغانستان نا ترندی اٹ بگڑینگوک آ حالیت آتون اوار اہم سفارتی امور آ سلابت کننگا وپاکستان اٹی کورونا دین انا ساڑی آ حالیت، دین انا زرگزرانی مضمرات و اوفتے تون مون تننگ کن کروک آ گام گیج آتا بابت ہم سرجم گپ وتران مس۔ وزیرخارجہ پارے کہ سمارٹ لاک ڈاؤن تون اوار ننا گچین حکمت عملی نا سوب آن پاکستان اٹی کورونا دین انا تالانی نا کچ اٹی کمتی بسنے، کورونا دین انا زرگزرانی مضمرات آتون مون تننگ کن غٹ کوشست آتے کاریم اٹ اتنگ انگ ءِ۔ وزیر خارجہ داسو واقعہ نا جاست وپاست اٹ داتم اسکان مون آ بروک آ پیش رفت آن کونسل نا باسک آتے معلومدار کرے۔ اوپارے کہ پاکستان اٹی دہشت گرد کارروائی تیٹی اوغان گل زمین ءِ کاریم اٹ اتنگ، است ہسونی نا سوب ءِ۔ پاکستان، ڈیہہ ٹی شونداری و شونہالی و رابطہ غاتا مون آ دننگ کن امن ءِ المی تکک۔ اوغانستان اٹی اگہ حالیت آک پین خراب مریرہ تو پاکستان غٹ آن زیات زہمی مریک۔ مخدوم شاہ محمود قریشی پارے کہ پاکستان، اوغانستان اٹی امن کن تینا خیرخواہی نا کوشست آتے برجاتخنگ کن سنبرینگوک ءِ۔ دیوان اٹی مقبوضہ جموں و کشمیرنا حالیت و ایلو اہم سفارتی امور نا بابت ہم گپ وتران کننگا۔
