اسلام آباد۔ 13اگست (اے پی پی) وزیراعظم عمران خان پارینے کہ ڈیٹا و ٹیکنالوجی نا کاریم اٹ اتنگ آن پاکستان اٹی نن اولیکو وار ہندن ءُ شفاف گچین کاری کرفنہ ہرانا نتیجہ غاک غٹ اکن قابل قبول مریر، حکومت نا اصل کاریم شاری تا زندءِ آسان کننگ ءِ۔ جمعہ نادے آ وزیراعظم عمران خان نادرا ہیڈ کوارٹر نا دورہ ءِ کرے۔ داوخت آ وزیراعظم نادرا نا پوسکن آ موبائل رجسٹریشن، وین ڈٹ انا بناءِ کرے۔ دورہ نا وخت آ وزیراعظم ءِ ایلین رجسٹریشن کارڈز پاک کوویڈ۔ 19موبائل ویکسی نیشن پاس، قومی تصدیق و تجدید مہم، و پوسکن آ نادرا رجسٹریشن سینٹر/پوسکن آ موبائل رجسٹریشن وین نا گام گیج آتا بارواٹ حوال ہم تننگا۔ وزیراعظم داوخت آ نادرا نا نیشنل ڈیٹا ویئر ہاؤس آ پریشن روم انا ہم دورہ ءِ کرے۔ دورہ ٹی وزیراعظم پارے کہ ایلین رجسٹریشن کارڈ آتا جاری کننگ آن درملکی تے کاروبار نا باضابطہ دنگ اٹ اوار کننگ مریک، پاکستان اٹی رہینگوک 30لکھ اوغان باہوٹءُ ہرافتے کن نادرا نا ڈیٹا مننگ اہمیت تخک داگام آن اوغان باہوٹ آتون اوار ایلو غیر رجسٹرڈ مخلوق قومی دنگ اٹ اوار مننگ کیرہ۔ او بینک اکاؤنٹ ملفنگ کیرہ وخت اس کہ کاروبار ہم کننگ کیرہ۔ وزیراعظم پارے کہ حکومت نا اصل کاریم شاری تا زند اٹی آسانی ودی کننگ ءِ۔ ڈیٹا و ٹیکنالوجی ءِ کاریم اٹ اتسا اولیکو وار پاکستان اٹی ہندن ءُ گچین کاری کرفنہ ہرافتا نتیجہ غاک غٹ انا قابل قبول مریرہ۔ نادرا نا ڈیٹا ءِ الیکٹرانک وونٹنگ مشین آتون گنڈسا نن 21می صدی نا گچین گچین کاری تے کرفنہ۔ داگام آن جعلی وونٹ و ٹھپہ نا سسٹم چٹک۔
