اسلام آباد۔ 12اگست (اے پی پی) وزیر مذہبی امور پیر نورالحق قادری تون عراقی وزیر خارجہ ڈاکٹر فواد حسین نا کماشی ٹی ڈل پنچ شنبے نادے آ وزارت مذہبی امور اٹی اوڑدہی کرے ہراٹی ہڑتوم آ ملک آتا نیام اٹ ہڑتوم آ کنڈآتا تعلقداری پاکستانی زائرآتیکن عراق نا ویزہ و آسراتی تتون اوار چندی بشخ آتے ٹی تین پہ تینی کمکاری ءِ مون آ دننگ نا امور آ گپ و تران کننگا۔ وزیر مذہبی امور پیر نورالحق قادری ڈل ءِ بخیر کرے و پارے کہ عراق انبیاو صحابہ کرام ؓ تا گل زمین ءِ و پاکستان نا الس عراق تون بھاز مہرومریبت تخک۔ ہڑتوم آ ملک آتا الس و حکومت آتا نیام اٹ تعلقداری تے پین مون آ دننگ کن پاکستان اٹ عراقی سفیر نا خذمت آک سفت نا قابل ءُ۔ نن عراقی حکومت نا کنڈآن زائر آتیکن آسراتی تا فراوانی نا بابت عراقی حکومت نا منت وار اُن۔ اوڈل ءِ وزارت مذہبی امور نا بین المذاہب ہم آہنگی و حج انا بابت وزارت نا زمواری تا بابت پارے۔ اوپارے کہ سعودی عرب، ایران و عراق کن پاکستانی زائر آتا بھلو کچ اس زیارت کن کاہک اوپارے کہ دنیا نا چندی مذہب آتیان تعلق تخوک آ مذہبی ذاکرآک ہم بھلو کچ اسے ٹی پاکستان آ بریرہ۔ پاکستان نا حکومت مذہبی زائر آتے آسراتی تا فراوانی کن چندی گام گیج کننگ ءِ۔ پاکستان نا حکومت ملک اٹی اقلیت آتا ہروڑ رکھ و اوفتا مذہبی عقیدہ نا رداٹ عبادت کن آجو و سازگار چاگڑد اس فراوان کننگ آ یخین تخک۔ داوخت آ سیکرٹری وزارت مذہبی امور سردار جعفر خان عراقی وزیر خارجہ و ڈل ءِ پاکستانی زائر آتا بابت سرجم آتیان معلومدار کرے و دااست خواہی نا درشانی ءِ کرے کہ دا معاملہ غا نن عراقی حکومت تون اسہ ایم او یو اسے آ دستخط کننگ نا خواہندار اُن۔ وزیر مذہبی امور پارے کہ پاکستان نا قومی ایئرلائن پی آئی اے کراچی و اسلام آباد آن نجف و بغداد کن جہاز چلیفنگ آ سجفنگ ءِ۔ عراقی حکومت آن ہم خواست ءِ کہ داعمل آن زائر آتے آسراتی مریک۔ ہرسال 30آن 40ہزار زائر بذریعہ ایران بارڈر زیارت کن کارہ۔ نن خوانہ کہ زیات آن زیات زائر عراق اٹی ساڑی مقدس ہند آتا زیارت کن کار و ہڑتوم آ ملک آک دازائر آتیکن آسراتی تا فراوانی ءِ پک کیر۔
