اسلام آباد۔ 12اگست (اے پی پی) بہاولپور اٹی لال سوہانرہ نیشنل پارک اٹی بشام نا شجرکاری نا چرجوئی ٹی 87ایکڑ آ 60ہزار نیال خلنگک، لال سوہانرہ نیشنل پارک اٹی جنگل آتے ٹی ودکی آن بہاولپور و کیبی نا آب وہواءِ گچین جوڑ کننگ اٹ کمک رسینگک و جنگل حیات آتا رکھ و ردوم ءِ پک کننگ مریک۔ پنچ شنبے نا دے آ وزیراعظم آفس نا میڈیا ونگ آن جاری بیان نا رداٹ وزیراعظم عمران خان لال سوہانرہ نیشنل پارک اٹی بشام نا شجرکاری نا چرجوئی ٹی 87ایکڑ آ 60ہزار نیال خلنگ نا مہم نا بناءِ کرے۔ لال سوہانرہ نیشنل پارک اٹی جنگل آتے ٹی ودکی آن بہاولپور و کیبی نا آب و ہوانا سفائی ٹی کمک رسینگک و جنگل حیات آتا رکھ و ردوم اٹ ہم کمک مریک۔ لال سوہانرہ ٹی نئے بیرہ مون انگا خزم انا ردوم سرسہب پک مسنے و اوفتا کچ ودنگ ءِ بلکن متحدہ عرب امارات نا کمک اٹ گریٹ انڈین بسٹرڈ نا افزائشی مرکز اس ہم جوڑ کننگ انگ ءِ۔ داوخت آ وزیراعظم پاننگاکہ حکومت کورونا ٹی پروٹیکٹڈ ایریاز انیشی ایٹیو نا پڑو ءِ کرے ہراڑآن نئے بیرہ جنگل و جنگلی حیات آتا رکھ ءِ پک کننگا بلکن روزگار نا وارخواہی ہم ودی مس۔ پین نیشنل پارک آتا کچ اٹی 15پوسکن آ پارک آتا ودکی ءِ کرسا 30آن 45کننگانے۔ بیرہ پنجاب اٹی ہی 1لکھ 50ہزار ایکڑ آ تالان 6پوسکن ءُ نیشنل پارک جوڑ کننگا ہرافتے ٹی ٹین بلین ٹری سونامی نا رداٹ ایکوٹورزم نا مون آ دننگ کن 1.5ارب روپئی تننگا۔ پین ساڑی آ جنگل آتا کچ ءِ ہم پورو وڑاٹ کاریم اٹ اتنگ کن درخت خلنگ انگ ءِ و لال سوہانرہ ٹی 60ہزار نیال آتا مہم ہم ہندا چرجوئی نا اسہ کڑی اسے۔ جنگل آتا رکھ ءِ پک کننگ کن نئے بیرہ پنجاب نیشنل پارک آتا سروس نا بناءِ کننگانے بلکن غیرکانودی پاٹ تا کاروبار نا توننگ کن ہم گام گیج کننگ انگ ءِ۔ ہندا چرجوئی ٹی لال سوہانرہ نا دامون ساڑی آ غٹ غیرکانودی آرآتا برخلاف کانودی کارروائی کننگا و پنجاب اٹی ایلو جاگہ غاتا ہم ہنداوڑنا گام گیج آتے پک کننگ انگ ءِ۔ دورہ ٹی وزیراعظم ءِ جنگل آتا چاروکی و رکھ اکن پوسکن آ ڈرون ٹیکنالوجی آ ہم سرجم حوال تننگا۔
