نیویارک۔ 12اگست (اے پی پی) اقوام متحدہ ٹی پاکستان نا سفیر منیر اکرم پارینے کہ دہشت گردی آن زہمی ملک پاکستان دہشت گردی نا چٹفنگ کن جہانی برادری تون کاریم ءِ برجاتخک۔ اوسلامتی کونسل نا بے آخبتی باسک کینیا نا کنڈآن اڈ ہلوک آ وینز ویلن مسکوہی سفارت کار انا پن آ ڈیگو آریاپنی آ دادیوان آن تران کرے ہرانا سرحال انسانی ہمدردی نا بارواٹ کارروائی:انسداد دہشت گردی آپریشن و سلہہ بند جھیڑہ غاتا حالیت آتے ٹی مون تروک چیلنج آتا مون ءِ توننگ“ ئس۔ پاکستانی سفارتی نمائندہ غاصب، پوسکن ءُ آبادی جوڑ کروک آ و کوزہ گیر ملک آتا کنڈآن آجوئی و حق خودارادیت نا روا جہد کروک آتے توننگ و دا جہد ءِ دہشت گردی نا وڑاٹ پیش کننگ نا ہم مذمت ءِ کرے۔ اوپارے کہ دہشت گردی نا مون ءِ توننگ نا آڑ اٹ کودک شاری تے اجتماعی وڑاٹ سزا تننگ و اوفتا بنداوی انسانی حق انا لتاڑنگ انسانی ہمدردی نا جہانی کانود آتا ہم خلاف ورزی ءِ۔ سفیر منیر اکرم مستی پارے کہ اقوام متحدہ نا تعلقدار قرارداد آتے ٹی ہم پیدوار وڑاٹ بیان کننگانے کہ درملکی تسلط، جور و استحصال بنداوی انسانی حق انا نفی ءِ۔ پاکستانی سفیر پارے کہ اقوام متحدہ نا ساڑی آ سلامتی کونسل نا انسداد دہشت گردی پابندی تیٹی اصلاحات نا گرج ءِ تانکہ دافتے ٹی خاص وڑاٹ ریگولیٹری منظرنامہ ہراکونسل نا چھتری نا رداٹ تیار کننگ انگ ءِ اوٹی ساڑی کانودی، انسانی و انسانی حق انا بارواٹ ساڑی آ خامی تے مر کننگ مرے۔ دہشت گردی نا مالی کمکاری نا شق آتا گیشتر کاریم اٹ اتنگ پدتموک ملک آتے ٹی انسانی ہمدردی نا بنداو آ کاریم کروک آ و فلاحی تنظیم تیکن وخت آ امداد سرکننگ نا لائخی و اوفتے کن المی فنڈ آتا دوئی کننگ نا کوشست آتے کن بے پناہ مشکل ودی کرینے۔ اوپارے کہ داحالیت و مون تروک حالیت آتا رداٹ داہندا ویل و باندات آتے ایسر کننگ بھاز المی ءِ تانکہ جہانی انسداد دہشت گردی نا حکمت عملی اس جوڑ کرسا اوڑآ عملدرآمد کننگ مرے۔
