اسلام آباد۔ 12اگست (اے پی پی) چیئرمین سینیٹ محمد صادق سنجرانی ورناتا جہانی دے انا وخت آ تینا کلہو اٹی پارینے کہ ورناچین ہرملک انا نہادی میرات و روشنا آخبت نا ضمانت مریک۔ ورناک ننا آخبت نا جوڑ کروک آک ءُ۔ ملکی شونداری و شونہالی کن ورناچین انا کڑد اہم ءُ حیثیت اس تخک۔ ہنداوسوب ءِ کہ مچ آ دنیا ٹی ورناتا اہمیت نا رداٹ 12اگست آ ورناتا جہانی دے ءِ اڈتننگک ہرانا مسخت ورناتا لائخی تا مون آ دننگ اوفتے مون تروک ویل آتا جاچ ءِ ہلنگ ءِ و شونداری و شونہالی کن غٹ ورناتے بریبر وارخواہی فراوان کننگ ءِ۔ نیزگاری، نسلی پرخ انا چٹفنگ تون اوار ورناتے گچین نشورنما و شونداری نا وارخواہی فراوان کننگ ءِ۔ اوپارے کہ ننا آجوئی، حاکمیت و روشنا آخبت نا ضمانت خوانوک آ ورنا چین ءِ۔ چیئرمین سینیٹ محمد صادق سنجرانی پارے کہ ورناک پبی لائخی تا خواجہ ءُ و اوفتا لائخی تیان سہی وڑاٹ فائدہ ہرفسا پاکستان ءِ دنیا نا عظیم و شون ہلوک ءُ ملک اس جوڑ کننگ مریک۔ ساڑی آ حکومت ورناتا راجی آسراتی و روشنا آخبت کن چندی گام گیج کننگ ءِ و اوفتا لائخی تیان پبی فائدہ ہرفنگ کن جامع حکمت عملی اس شین تننگ انگ ءِ۔ ساڑی حکومت ورناتے واکدار و اوفتا لائخی تے مون آ اتنگ، سازگار چاگڑد و شونداری نا اسہ وڑ وارکواہی فراوان کننگ کن دے و نن کوشست کننگ ءِ۔ ورناک ملک انا شونداری و شونہالی کن کڑد ادا کیرو ورنا چین آن اومیت کینہ کہ ننا نرزور باوہ پیرہ نا کنڈآن میرات اٹ ملوک دا زیباانگا وطن نا مہرومریبت آجوئی تون عشق ءِ برجاتخنہ و عظیم قدر ءِ بروک آچین تسکان سرکینہ۔ ورناچین بانی پاکستان قائد اعظم محمد علی جناح نا فرمان نا رداٹ ”کاریم کاریم و بیرہ کاریم“ آ چکار تخر تانکہ او ملک انا نہادی میرات مرسا ملک انا پن ءِ روشنا کننگ کیر و دنیا نا ہر بشخ اٹی تینے منفنگ کیر۔ پاکستان نا ورناچین دفاع پاکستان آن ہلیس تعمیر پاکستان اٹ کڑد ادا کننگ ءُ ہراڑآ مچ آ قوم ءِ گمر ءِ۔
