تربیلا۔ 12اگست (اے پی پی) وزیراعظم عمران خان پارینے کہ ملک اٹ چاگڑد دوست بجلی ودی کننگ نا کوشست کننگ اُن، 10سال اٹی پوسکن ءُ ڈیم جوڑ کینہ، مہمند ڈیم 2025و بھاشا ڈیم 2028اٹی پورو مریرہ ہراتم اسکان ڈیم جوڑ مفک نن دیر ءِ کوڑی کننگ کپنہ۔ وزیراعظم داخیال آتا درشانی ءِ پنچ شنبے نادے آ تربیلا 5ودکی ڈٹ انا بنداو ءِ تخنگ نا دود آن تران کرسا کرے۔ اوپارے کہ کوشست ءِ کہ 2030اسکان پاکستان اٹ چاگڑد دوست بجلی جوڑ مرے، تربیلا نا ودکی ڈٹ آن چاگڑد دوست بجلی ودی مریک، ساڑی حکومت 10سال اٹی 10پوسکنءُ ڈیم جوڑ کیک وخت اس کہ تفنگوک آ مہمند ڈیم 2025و بھاشا ڈیم 2028اٹی پورو مریرہ۔ وزیراعظم پارے کہ مستین اٹ بجلی کن کبین ءُ معاہدہ کننگا ہراٹی حکومت ءِ کبین ءُ بجلی ہلوئی تمنگ ءِ، حکومت پن بجلی و شمسی توانائی آن بجلی جوڑ کننگ کن پبی کوشست کننگ ءِ۔ اوپارے کہ مچ آ دنیا ٹی موسمیاتی بدلی نا ویل مون تروک ءِ ہرانا سوب آن دنیا نا موسم ترندی اٹ باسن مننگ ءِ، جیکب آباد داوخت آ باسن انگا علاقہ ءِ، جنگل آتے ٹی مہالو داوڑ خاخر لگتوکہ ہراوڑ داسہ لگنگ ءِ، روس، ترکی و یونان اٹی داوڑ خاخر لگوک ءِ ہراکہ انسانی تاریخ اٹ اسل لگتنے، داکان مست داوڑ ءُ نوکاپ بتنے ہراوڑ داسہ بننگ ءِ۔ اوپارے کہ چین دنیا ٹی ترندی اٹ مون آ ہِننگ ءِ، چین آخبت نا وخت آن مست ڈٹ بندی ءِ کیک، آخبت کن وخت آن مست ڈٹ بندی نا گرج ءِ۔ اوپارے کہ نن ہندن ءُ بجلی جوڑ کینہ ہراڑآن گلوبل وارمنگ آ اثر تمپ۔ وزیراعظم پارے کہ تربیلا نا ودیکی ڈٹ آن تربیلا ڈیم انا زند مرغن مریک، بیرہ4میل مر مش ءِ ہراڈیم اٹی پُرمریک، داودکی ڈٹ آن ڈیم اٹی بروک آ مش تے فلش کننگ اٹ کمک رسینگک۔ داسو و بھاشا ڈیم انا وخت آ جوڑ مننگ ہم المی ءِ انتئے کہ داڑآن تربیلا ڈیم اٹی مش انا پُرمننگ کم مریک ہراڑآن ڈیم انا زند زیات مرغن مریک۔ وزیراعظم داہیت آ است ہسونی نا درشانی ءِ کرے کہ نن مہالو داگڑاتیا سجفتون، بھاشا ڈیم ءِ جوڑ کننگ نا فیصلہ 1984ٹی مسوسس۔ او سوج کرے کہ انت مستین اٹ کس اسے نا دور انا سوچ الوکہ، مستین نا حکومت آک شاید پنچ پنچ سال تینا الیکشن تا سجفیرانتئے کہ ڈیم جوڑ مننگ اٹ وخت لگک۔ داہیت ذکر انا قابل ءِ کہ تربیلا ڈیم انا پنچ می ودکی ڈٹ 807ملین ڈالرنا خڑچ آن تفنگ انگ ءِ ہراڑکن جہانی بینک و ایشین انفراسٹرکچر انویسٹمنٹ بینک ڈٹ انا تفنگ کن مالی کمک فراوان کننگ ءُ، دا ڈٹ 3سال انا چنکو وخت اسے ٹی 2024اسکان پورو کننگک، ڈٹ انا بنداوی مسخت آخبت اٹ تربیلا ڈیم ءِ مش انا پُر مننگ نا خطرہ غاتیان رکھ کننگ ءِ، ڈٹ آن تربیلا ڈیم آن کشاری مسخت آتے کن پائیدار بنداو تیا دیر انا دوئی برجاسلک۔ تربیلا پنچ می ودکی ڈٹ آن 1530میگاواٹ چاگڑد دوست و اڑزآن پن بجلی دوئی مریک، ڈٹ ہرسال نیشنل گریڈ ءِ اسہ ارب 34کروڑ یونٹ اڑزآن بجلی ایتک وخت اس کہ تربیلا نا پنچ می ودکی ڈٹ انا تفنگ آن ملازمت آتا 3ہزار وارخواہی ودی مریک۔ ڈٹ انا سوب آن تربیلا غان بجلی ودی کننگ نا لائخی 4ہزار 888میگاواٹ آن ودسا 6ہزار 418میگاواٹ مریک۔ تربیلا پنچ می ودکی ڈٹ پاکستان نا دیر، خور و توانائی نا اہم گرج آتے پورو کننگ اٹ اہم کڑد ادا کیک۔
