کوئٹہ۔ 12اگست (اے پی پی) پارلیمانی سیکرٹری اقلیتی امور خلیل جارج، بلوچستان عوامی پارٹی نا راہشون و سینیٹر دنیش کمار پالیانی، مسکوہی صوبائی وزیر روشن خورشید بروچہ، سیکرٹری اقلیتی امور نور محمد جوگیزئی، سیکرٹری مذہبی امور عبدالطیف کاکڑ، قاری عبدالرشید، تنزیلہ خلیل، ڈاکٹر فائزہ و ایلوفک پارینو کہ پاکستان اقلیت آتے کن رکھ انگا ملک ءِ، ننا باوہ پیرہ آزادی نا وخت آ پاکستان اٹی رہینگ انگ نا سہی فیصلہ کریر، پاکستان اٹی ہر اقلیت ءِ لس شاری نا بریبر حق دوئی ءِ ہرانا سوب آن اقلیت آک ملکی شونداری ٹی تینا کڑد ءِ ادا کرینو، اقلیت آتا حق انا بابت دین اسلام نا بھاز پیدوار پارت آک ءُ ہراڑآ ننے عمل کننگ نا گرج ءِ، جہانی یوم اقلیت نا دے مچ آ دنیا ٹی اڈتننگ نا بنداوی مسخت مخلوق ءِ اوفتا حق انا بارواٹ آگہی تننگ و حکومت آتے دا باور کرفنگ ءِ کہ او تینا غٹ شاری تے بے پرخ اوفتا حق فراوان کیرہ۔ داہیت ءِ اوفک محکمہ اقلیتی امور نا کنڈآن ہندی ہال اٹی اقلیت آتا جہانی دے انا وخت آ اڈ ہلوک آ دود آن تران کرسا پاریر۔ اوفک پاریر کہ پاکستان اٹی رنگ، نسل، فرقہ، مذہب نا بنداو آ اقلیت آتا حق ءِ سلب کننگپک نئے اوفتے کم تر تکنگک ہرانا سوب آن اینو اقلیت آتیان تعلق تخوک آ بندغ آک نئے بیرہ سیاست بلکن پاکستان نا فوج، بیوروکریسی، تعلیم، جان جوڑی تون اوار ہر بشخ اٹی خذمت سرتننگ ءُ۔ اوفک پاریر کہ قائد اعظم محمد علی جناح پاکستان اٹی رہینگوک آ ہر بندغ ءِ بریبری نا شاری گوندانے ہندا ملک انا راہشون اصول ءِ ہرانا سوب آن اینو اسکان ننے اسہ مشکل اسے تون ہم مون تروئی تمیتنے۔ اوفک پاریر کہ حکومت پاکستان و بلوچستان ہمیشہ اقلیت آتا ویل آتے بنگر و اوفتے ایسر کننگ نا کوشست کرینو اومیت ءِ کہ دا چرجوئی آخبت اٹ ہم برجاسلک۔ اوفک پاریر کہ اقلیتی برادری تا نیام اٹ ہچ وڑنا پرخ اس اف، نن غٹ اسٹ اُن و تینا برادری نا گچینی کن اواری اٹ کاریم کرسا کینہ۔ اوفک پاریر کہ وزیراعلیٰ بلوچستان جام کمال خان نا کماشی ٹی جوڑ مخلوط صوبائی حکومت 3سال اٹی اقلیت آتے اخس کہ فنڈ تس اوفتا مستین اٹ درور ملیپک۔ اوفک پاریر کہ وزیراعلیٰ بلوچستان جام کمال خان نا کماشی ٹی صوبائی حکومت اقلیتی برادری نا راجی آسراتی کن ہم گام گیج کننگ ءِ اینخو سال انا بجٹ اٹ اقلیت آتا راجی آسراتی کن 500ملین روپئی جتا کننگانے وخت اس کہ سرکاری ملازمت آتے ٹی اقلیت آتا کوٹہ ءِ ودفسا 2 درسد آن 5 درسد کرینے۔
