تربیلا۔12اگست (اے پی پی): مزن وزیر عمران خان ءَ 807 ملین ڈالر ءِ ھرچ ءَ تربیلا پن بجلی منصوبہ ( ٹی۔5) ءِ بُن اِشت ایر کتگ، اے منصوبہ ءِ جوڑ بوہگ ءَچہ تربیلا ڈیم ءِ بجلی ءِ پیداوا 4 ہزار 888 میگاواٹ ءَ چہ گیش بیت ء ُ 6 ہزار 418 میگاواٹ بیت۔ پنچ شمبےءِ روچءَ مزن وزیر عمران خان ءَ انوگیں حکومت ءِ وژن ’’عشرہ ڈیمز 28۔2018 ‘‘ءِ ردءَ تربیلا 5 پراہ ءُ شائیگانی ءِ منصوبہ ءِ بُن اِشت ایر کتگ۔ اے منصوبہ 2024 ءَ سرجم بیت ء ُمیاں اوستمانی بینک 390 ملین ڈالر وہدے کہ ایشیئن انفراسٹرکچر انویسٹمنٹ بینک (اے آئی آئی بی) 300 ملین امریکی ڈالر دنت۔ مزن وزیر ءَ راے موہ ءَ چیئرمین واٹر اینڈ پاور ڈویلپمنٹ اتھارٹی (واپڈا) لیفٹیننٹ جنرل (ر) مزمل حسین ءَ منصوبہ ءِ ہوالگءَ شونست داتگ۔ شونست ءِ تہا مزن وزیر ءَ را حال دیئگ بوتگ کہ ٹی۔5 ہائیڈرو پاور پراجیکٹ ءَ چہ ڈیم ءَ آک پُر بوہگ ءِ جیڑہ ءِ گیش ءُ گیواری ءَچہ تربیلا ڈیم ءِ زند گیش بیت ء ُ آپکاشی ءِ ھاترءَ آپ گیش بیت۔ مزن وزیر ءَ را حال دیئگ بوتگ کہ اے منصوبہ ءَ چہ 1530 میگاواٹ ارزانیں ء ُ ماحول دوستیں بجلی ودی بیت۔ 5 منصوبہ آنی سرجمی ءَ چہ تربیلا ڈیم ءِ بجلی 4888 میگاواٹ ءَ چہ گیش بیت ء ُ 6418 میگاواٹ بیت۔ مزن وزیر ءَ را حال دیئگ بوتگ کہ ٹی ۔5 منصوبہ ءَ چہ ہمک سال نیشنل گرڈ ءَ را 1.347 ارب یونٹ ارزانیں ءُ گرین انرجی حاصل بیت۔ مزن وزیر ءَ اے موہ ءَ نہالے ہم کشتگ۔ راجی اسمبلی ءِ اسپیکر اسد قیصر ، اقتصادی کارانی بنجاہی وزیر عمر ایوب خان، آپی آسراتی ءِ بنجاہی وزیر چوہدری مونس الہیٰ ، حال ء ُاھیوال کاری ء ُ شنگکاری ءِ وزیر فرخ حبیب ، گورنر خیبر پختونخوا فرمان ءُ سروزیر محمود خان ہم اے موہ ءَ ساڑی بوتگ۔
