اسلام آباد۔11اگست (اے پی پی): بنجاھی وزیر اھوالکاری ءُ شنگ کاری فواد حسین ءَ نیک راھی یکیم آنی شرپ ءُ حکومت ءِ بنیاتی پالیشی نامینان ءَ گوشت کہ رحیم یار خان ءَ گور آنی روچ ءِ موہ ءَ مندر ءِ دوارگ پچ بوھگ حکومت ءِ نیمگ ءَ گور آناں انساپ دیگ ءِ ارزشت ءَ سہرا کنت۔ چار شمبے ءِ روچ ءَ وتی ٹویٹ ءَ بنجاھی وزیر اھوالکاری ءُ شنگ کاری ءَ نیک راھی یکیم آنی شرپ مئے بنیاتی پالیشی انت ءُ ما اے گپ ءَ دل یکیم کناں کہ پاکستان ءِ کانود ءِ لوٹ آنی رد ءَ توامیں شہری زندمان ءُ آزاتی ءِ نعمت ءَ چہ شات ءُ شاتکام بہ بنت۔ یات دارگ بہ بیت کہ رحیم یار خان ءِ دمگ بھونگ شریف ءَ 24 جولائی ءَ ھشت سالی ہندو زھگ ءِ ھلاپ ءَ مذہب ءِ توہین کنگ ءِ کیس درج کنائینگ بوتگ، پولیس ءَ زھگ ءَ را دزگیر کتگ ءُ 4 اگست ءَ ھندی آمید گس ءَ پیش کتگ، آمید گس ءَ زھگ ءِ زمانت منظور کتگ ءُ ایشرا یلو کنگ ءِ حکم داتگ گڈا اے ساھت ءَ مُچ ءُ میڈی بوتگ ءُ جاک کنگ بوتگ ھمے ساھت ءَ مُچی ءُ میڈی ءِ مردم آں یک مندرے ءَ را پروشتگ پدا ھم مزن وزیر ءَ نوٹس زرتگ ء ُ اے مندر ءَ را برجائی ءِ حکم داتگ۔ پمے ھاترا 11 اگست ءَ آماچ بوتگیں مندر ءِ برجائی کنگ بوتگ۔ پاکستان ہندو کونسل ءِ سروک ءُ راجی اسمبلی ءِ باسک ڈاکٹر رمیشن کما ر ءَ گور آںی روچ ءِ موہ ءَ بھونگ شریف ءَ راجی بیرک ٹنگ ات ءُ نیک راھی رسم آناں پیلو کنان ءَ آماچیں مندر ءِ برجا ءِ بنگیج کت۔
