اقلیتی برادری تے اوفتا حق آن محروم کرسا اسہ راج اس ہم تینا راجی و زرگزرانی شونداری نا ہدف آتے دوئی کننگ کپک، وزیراعظم عمران خان نا ”قومی اقلیت آتا دے“ انا وخت آ کلہو

اسلام آباد۔ 11اگست (اے پی پی) وزیراعظم عمران خان پارینے کہ اقلیتی برادری تے اوفتا حق آن محروم کرسا اسہ راج اس ہم تینا راجی و زرگزرانی شونداری نا ہدف آتے دوئی کننگ کپک، اعتدال پسند و شونداری پسند راج انا ٹہیفنگ کن بین المذاہب ہم آہنگی و نزور آتا رکھ المی ءِ۔ وزیراعظم ”قومی اقلیت آتا دے“ انا وخت آ تینا اسہ کلہو اسے ٹی پارے کہ دادے ءِ ”قومی اقلیت آتا دے“ انا وڑاٹ اڈتننگ، ننااقلیتی برادری تے بریبر شاری نا حق انا رکھ و اوفتے زند انا غٹ بشخ آتے ٹی گچین چاگڑد اس فراوان کننگ نا بابت ریاست نا عزم انا درشانی ءِ۔ حکومتی کہول آ دادے ءِ اڈتننگ ہم دااہم کڑد انا امنائی ءِ ہرا ننا اقلیت آک پاکستان نا شونداری کن کڑد ادا کننگ ءُ۔ وزیراعظم پارے کہ ”ریاست مدینہ“ ننا رول ماڈل نا وڑاٹ و بابائے قوم انا وضع کروک راہشون اصول آتون کنا حکومت داہیت آ سوگو یخین تخک کہ اقلیت آتے اوفتا حق آن محروم کرسا و اوفتے ایلو درجہ نا شاری سمجھسا اسہ راج اس ہم تینا راجی و زرگزرانی شونداری نا ہدف آتے دوئی کننگ کپک۔ نن سمجھنہ کہ بین المذاہب ہم آہنگی و نزور آتا رکھ نئے بیرہ اسہ اعتدال پسند و شون پسند راج اسے نا ٹہیفنگ کن المی ءِ بلکن دا انتہاپسندی، خار و راج انا نزور تپہ غاتا برخلاف ڈوہ انا ودوک آ ریسہ نا برخلاف ہم اسہ جوان ءُ عمل اسے۔ وزیراعظم پارے کہ تینا منشور اٹی کروک آ قول آتا رداٹ نن بین المذاہب ہم آہنگی ءِ مون آ دننگ و اقلیتی برادری تے تینا آئینی، کانودی و معاشرتی حق انارکھ انا بارواٹ پت انا احساس ترفنگ نا ہرممکن کوشست کننگ اُن، نن تینا قومی اقلیتی کمیشن ءِ واکدار جوڑ کرینن کہ او تینا کڑد ءِ گچین وڑاٹ ادا کے، نن سرکاری ملازمت آتے ٹی اقلیت آتے کن جتا 5 درسد ملازمت نا کوٹہ نافذ کننگ کن سنبرینگوک اُن۔