اسلام آباد۔ 11 اگست (اے پی پی) وزیراعظم عمران خان پارینے کہ پاکستان اوغان امن عمل و ویل انا سیاسی ایسری کن کوشست آتے ٹی کمکاری ءِ برجاتخک، اومیت ءِ اوغان راہشون اوغان ویل انا وسیع البنداو و جامع سیاسی ایسری کن جہانی ہم آہنگی نا اہمیت ءِ امنا کیرہ، جموں و کشمیر نا جھیڑہ تون اوار غٹ باندات آتیا ترکی نا سوگو و پدریسہ مخ تفی نا منت وار اُن۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او ترکی نا وزیر دفاع حلوسی آکار تون گپ وتران کرسا کرے ہرا چارشنبے نادے آ داڑے اوڑتون اوڑدہی کرے۔ اوڑدہی ٹی وزیراعظم عمران خان پاکستان و ترکی نا نیام اٹ بے مٹ تین پہ تینی پت و تین پہ تینی مخ تفی نا بنداو آ تاریخی تعلقداری تے تالان کرے۔ وزیراعظم ترکی نا صدر رجب طیب اردوان و ترکی نا ایلم الس کن نیک است خواہی تا درشانی ءِ کرے۔ وزیراعظم ترکی ٹی جنگل آتے ٹی لگوک آ خاخر آن نسخان تیا ہمدردی نا ہم درشانی ءِ کرے۔ پاکستان نا کنڈآن یکجہتی و دا آفت تون مون تننگ کن ہرممکن امداد نا درشانی ءِ کرے۔ وزیراعظم ہڑتوم آ کنڈآتا دفاعی کمکاری نا ساڑی آ کہول آ است جمی نا درشانی ءِ کرے و غٹ باندات خاص وڑاٹ جموں و کشمیر نا جھیڑہ غا پاکستان نا پبی و پدریسہ مخ تفی آ ترکی نا منت واری ءِ ہرفے۔ علاقائی باندات نا بابت وزیراعظم اوغان امن عمل نا بابت پاکستان نا نقطہ نظر آن اودے معلومدار کرے۔ وزیراعظم پارے کہ ہیت وگپ انا کمک اٹ سیاسی ایسرہی مون آ ہِننگ نا کسر ءِ۔ وزیراعظم اومیت ظاہر کرے کہ اوغان راہشون دا چرجوئی ٹی پیش رفت و وسیع البنداو سیاسی ایسری نا دوئی کننگ کن جہانی اہم آہنگی نا اہمیت ءِ امنا کیرہ۔ وزیراعظم پارے کہ پاکستان اوغان امن عمل و سیاسی ایسری کن کمک کننگ نا کوشست آتے ٹی کمک کیک۔ ترکی نا وزیر دفاع صدر اردوان نا کنڈآن وزیراعظم ءِ نیک است خواہی تا کلہو ءِ سرکرے و جموں کشمیرتون اوار غٹ ویل آتیا ترکی نا کنڈآن پاکستان نا مخ تفی نا درشانی ءِ کرے۔ اووزیراعظم تون اوڑدہی ٹی دفاع تون اوار تین پہ تینی فائدہ نا غٹ بشخ آتے ٹی کمکاری ءِ ودفنگ نا باندات آ گپ وتران کرے۔ اوغانستان اٹی سیاسی ایسری کن ترکی نا کوشست آتا ہم ذکر ءِ کرے۔ حلوسی آکار نا دورہ پاکستان و ترکی نا نیام اٹ اہم ہڑتوم آ کنڈآتا جہانی امور آ سلابت کن بڑزکو کہول انا دورہ غاتا بشخ اسے۔
