اسلام آباد۔ 11 اگست (اے پی پی) صدر مملکت ڈاکٹر عارف علوی ملک انا راجی و زرگزرانی شونداری ٹی اقلیت آتا کڑد انا ستاءِ کرسا پارینے کہ پاکستان اٹی اقلیت آتے آئین نا رداٹ غٹ سیاسی، زرگزرانی و راجی حق دوئی ءِ، حکومت اوفتا حق انا رکھ و راجی آسراتی کن ہرممکن کوشست کیک، پاکستان ءِ اسہ سوگو ءُ و شونہال ملک اس جوڑ کننگ کن مہرومریبت، رواداری، ایلمی و سیوت نا جوزہ ءِ مون آ دننگ نا گرجءِ۔ اقلیت آتا قومی دے انا وخت آ قوم انا پن آ تینا کلہو اٹی صدر مملکت پارے کہ پاکستان ہرسال 11 اگست نا دے اقلیت آتا تعلیم، سائنس، عدلیہ، سول سروس و دفاع تون اوار ایلو بشخ آتے ٹی خذمت آتا امنائی ٹی ”اقلیت آتا دے“ انا وڑاٹ اڈایتک۔ اقلیت آک ملک انا راجی و زرگزرانی شونداری ٹی سفت نا قابل کڑد ادا کرینو۔ اوپارے کہ کنے دا پارسا خوشی محسوس مننگءِ کہ پاکستان اٹ اقلیت آتے آئین پاکستان نا رداٹ ضمانت کروک غٹ سیاسی، زرگزرانی و راجی حق دوئی ءِ۔ صدر مملکت پارے کہ ننا مذہب اسلام ہم اقلیت آتا حق ءِ پورو وڑاٹ امنا کیک و اوفتا حق انا رکھ انا بھاز مخ تف ءِ۔ میثاق ءِ مدینہ ٹی ہم غٹ مذہبی رڑتے اسہ وڑ مذہبی و سیاسی حق انا ضمانت تننگاسس۔ اوپارے کہ حکومت پاکستان اقلیت آتا راجی آسراتی کن پدریسہ کوشست کرسا کرینے۔ پاکستان آئین اٹی اقلیت آتے تروک آ حق انا عملی فراوانی نا چاروکی کن قومی اقلیتی کمیشن اس جوڑ کرینے۔ ہنداوڑ اقلیت آتے ملک انا زرگزرانی و سیاسی شونداری ٹی تینا کڑد ءِ ادا کننگ نا قابل جوڑ کننگ کن سرکاری ملازمت آتے ٹی 5 درسد کوٹہ تون اوار اوار پارلیمنٹ نا ہڑتوم آ ایوان تیٹی اوفتے جتا ءُ نشست جتا کرے۔ داکان بیدس، اقلیتی برادری نا طالب علم و باسک آتا تعلیم و عبادت گاہ تا خیالداری کن گرانٹ و مالی امداد نا فراوانی کن ہم گام گیج کننگ انگ ءِ۔
