اسلام آباد۔ 11 اگست (اے پی پی) صدر مملکت ڈاکٹر عارف علوی پارینے کہ پاکستان و ترکی نا نیام اٹ دفاعی بشخ اتون اوار تعلقداری تیٹی پین ودکی اتنگ نا گرج ءِ، اسلام دشمنی کون آ بھلا چیلنج آتا مون ءِ توننگ کن عالم اسلام ءِ سیوت نا گرج ءِ، پاکستان اوغانستان اٹی امن و سوگوی نا مون آ دننگ کن مخلصانہ کڑد ادا کننگ ءِ، پاکستان قبرص نا معاملہ غا ترکی نا مخ تفی ءِ برجاتخک۔ داخیال آتا درشانی ءِ او ترکی نا وزیر دفاع، جنرل (ر) خلوصی آقار تون اوڑدہی ٹی کرے۔ صدر مملکت ڈاکٹر عارف علوی پارے کہ پاکستان و ترکی نا نیام اٹ برادرانہ تعلقداری نا مرغن ءُ تاریخ اسے، ہڑتوم آ ملک آتا نیام اٹ دفاعی بشخ اتون اوار تعلقداری تیٹی پین ودکی اتنگ نا گرج ءِ، اوپارے کہ پاکستان و ترکی جہانی امور آ اسہ وڑنا خیال تخرہ، پاکستان و ترکی نا نیام اٹ جہانی فورم تیا پورو کمکاری ءِ۔ صدر مملکت پارے کہ اسلامی دنیا ءِ چندی ویل مون تروک ءِ، اسلام دشمنی کون آ بھلا چیلنج آ تا مون ءِ توننگ کن عالم اسلام ءِ سیوت نا گرج ءِ۔ پاکستان اوغانستان اٹی مرغن جنگ آن بھاز زہمی مس، اوپارے کہ اوغانستان اٹی امن نا غٹ آن زیات فائدہ پاکستان ءِ مریک۔ پاکستان اوغانستان اٹی امن و سوگوی نا مون آ دننگ کن مخلصانہ کڑد ادا کننگ ءِ۔ پاکستان قبرص نا معاملہ غا ترکی نا مخ تفی ءِ برجاتخک۔ صدر مملکت کشمیر و ایف اے ٹی ایف اٹ پاکستان نا مخ تفی آ ترکی نا منت واری ءِ ہرفے۔ ترک وزیر دفاع ترک صدر، رجب طیب اردوان، نا کنڈآن صدر عارف علوی ءِ ترکی نا دورہ نا سلہ نامہ اس پیش کرے۔ ترک وزیر دفاع خلوصی آقار پارے کہ ہڑتوم آ برادر ملک آتے تین پہ تینی فائدہ نا امور آ اسیجائی کوشست آتے برجاتخنگ نا گرج ءِ، ترکی تنازعہ جموں و کشمیر آ پاکستان نا مخ تفی ءِ برجاتخک، اوپارے کہ ہڑتوم آ ملک آتا نیام اٹ فوجی تربیت تون اوار ایلودفاعی بشخ آتے ٹی کمکاری ءِ ودفنگ نا گرج ءِ۔
