اسلام آباد۔ 10اگست (اے پی پی) صدر مملکت ڈاکٹر عارف علوی تون نائیجرنا قومی اسمبلی نا اسپیکر سینی عمارو نا کماشی ٹی پارلیمانی ڈل سے شنبے نادے آ داڑے اوڑدہی کرے۔ داوخت آ ڈل اتون گپ وتران کرسا صدر مملکت پارے کہ پاکستان ”لک افریقہ“ پالیسی نا رداٹ نائیجریاتون تعلقداری تے خاص اہمیت ایتک، پاکستان و نائیجرنا نیام اٹ ہڑتوم آ کنڈآتا زرگزرانی و واپاری تعلقداری تیٹی ودکی نا گرج ءِ۔ صدر مملکت پارے کہ پاکستان داسال نائیجرنا 100طالب علم آتے پاکستان اٹ تعلیم تننگ کن اسکالرشپ ایتک۔ اوپارے کہ پاکستان و نائیجر نا نیام اٹ پارلیمانی کمکاری نا یات داشت آن ہڑتوم آ کنڈآتا تعلقداری تیٹی پین گچینی بریک، ہڑتوم آ ملک آتا نیام اٹ واپار و کاروبار نا مون آ دننگ کن اولیتی واپاری معاہدہ نا گرج ءِ۔ نائیجرنا قومی اسمبلی نا اسپیکر سینی عمارو پارے کہ نائیجر پاکستان تون چندی بشخ آتے ٹی کمکاری ءِ مون آ دننگ نا خواہندار ءِ۔ نائیجر کاروبار، زرگزران، واپار و کشت وکشار نا بشخ آتے ٹی پاکستان تون سوگو تعلقداری خواہک وخت اس کہ کشاری پیدوار اٹی ودکی و نہری نظام نا تفنگ کن پاکستان نا کمکاری نا خواہندار ءِ۔ اسپیکر نائیجرقومی اسمبلی پاکستان نا کنڈآن 100اسکالرشپ و مہمانداری آ پاکستان نا ستاءِ کرے۔ داوخت آ او صدر مملکت ءِ نائیجر نا دورہ نا ہم سلہ ءِ خلک۔
