اسلام آباد۔10اگست (اے پی پی) وزیرخارجہ شاہ محمود قریشی پارینے کہ پاکستان، نائجر تون اوار افریقی ملک آتون واپاری، اقتصادی و کثیر الجہتی بشخ آتے ٹی ہڑتوم آ کنڈآتا کمکاری ءِ مون آ دننگ نا خواہندار ءِ۔ داہیت ءِ او پاکستان نا دورہ غا بروک آ، نائجر نا قومی اسمبلی نا صدر سینی اوماروتون گپ وتران کرسا پارے ہرا سے شنبے نادے آ وزارت خارجہ ٹی ڈل اتون اوار اوڑتون اوڑدہی کرے۔ گپ وتران اٹی ہڑتوم آ کنڈآتا تعلقداری، چندی بشخ آتے ٹی کمکاری ءِ مون آ دننگ تون اوار تین پہ تینی است خواہی نا باندات آ گپ وتران کننگا۔ وزیر خارجہ پارے کہ پاکستان و نائجر نا نیام اٹ برادرانہ و سوگو، تعلقداری ءِ، پاکستان، وزیراعظم عمران خان نا وژن ءِ مون آ تخسا، اقتصادی اولیتی ایجنڈاغا عمل کننگ ءِ۔ وزیر خارجہ نائجرنا دارالحکومت نیامے ٹی او آئی سی وزرائے خارجہ کونسل نا چل ءُ ہفت می دیوان نا اڈتننگ و پبی مہمانداری نا ستاءِ کرے و نائجر نا کنڈآن مقبوضہ جموں و کشمیر نا بابت قرارداد نا پبی مخ تفی آ نائجرسرکڑدہ غاتا منت واری ءِ ہرفے۔ وزیرخارجہ پارے کہ ہڑتوم آ ملک آتا نیام اٹ اقوام متحدہ تون اوار جہانی فورم تیا ہڑتوم آ کنڈآتا کمکاری است جمی نا سوب و پارلیمانی رابطہ غاتا مون آ دننگ ستاکڑزک۔ ہڑتوم آ وزیر خارجہ غاک پاکستان و نائجرنا نیام اٹ پارلیمانی کمکاری نا معاہدہ نا ستاءِ کریر۔ صدر نائجر اسمبلی سینی اومارو مشکل وخت اٹی پاکستان نا کنڈآن تروک آ کمکاری نا ستاءِ کرسا پاکستان نا سرکڑدہ غاتا منت واری ءِ ہرفے۔
