اسلام آباد۔ 10اگست (اے پی پی) وزیرداخلہ شیخ رشید احمد پارینے کہ اسرائیل، بھارت و این ڈی ایس اواری اٹ پاکستان ءِ تہہ آن نسخان تننگ اٹ لگوک ءُ، دشمن ننا دے ٹکی و سویلی ہڑتوم آ کنڈآتیا ویل ودی کننگ خواہک، پاکستان آن مقبوضہ کشمیر اٹی دہشت گرد گدریفنگ نا سوج ہی ودی مفک، بھارتی وزیر داخلہ نابیان غیر زموارانہ ءِ، محرم الحرام اٹی فول پروف سیکورٹی فراوان کننگک، اوغانستان نا تہہ نا سیاست تون ننا ہچ ءُ تعلق اس اف، غٹ سیمک بند ءُ، ڈٹ بندی نا رداٹ دوبہ خلنگ انگ ءِ، نن امن کن کوشست کننگ اُن، سمارٹ آئی ڈی کارڈ آتے ٹی پین فیچر اوار کننگک۔ سے شنبے نادے آ وزارت داخلہ ٹی پریس کانفرنس آن تران کرسا اوپارے کہ وزیراعظم عمران خان نا پارت آتے مون آ تخسا نادرا ءِ گچین جوڑ کننگک۔ وزیراعظم ءِ نادرا نا دورہ ءِ کننگ نا سلہ خلنگک۔ وزیر داخلہ غٹ اعزادارآتیا زور شاغاکہ او این سی او سی نا پارت و ایس او پی تیا سختی اٹ عمل کیر۔ دابابت غٹ چیف سیکرٹری و آئی جی تے ہم پارت کرینن۔ ضرورت تما تو تینٹ ہم صوبہ غاتا دورہ ءِ کیوہ۔ اوپارے کہ مسکوہی فاٹا نا علاقہ غاتے ٹی تھری جی، فورجی سروس 10محرم اسکان بند مریک۔ سیکورٹی ءِ پک کننگ کن پین جاگہ اس ہم انٹرنیٹ سروس ءِ بندکروئی تما تو معلومدار کننگک۔ ملکی سلامتی کن ہرشاری تینا کڑد ءِ ادا کے۔ نن کس اسے نا عقیدہ ءِ سرفپنہ و تینا عقیدہ ءِ اِلیپنہ نا اصول آتیا سلوک اُن۔ اوپار ے کہ اعزادار آتا جلوس آتے فول پروف سیکورٹی فراوان کننگک۔ وزیرداخلہ بھارتی وزیر داخلہ نا کنڈآن پاکستان آ مقبوضہ کشمیر اٹی دہشت گرد گدریفنگ نا دوبہ ءِ رد کرسا پارے کہ دا دروغ و غیر زموارانہ سوچ انا ڈیک ءِ ایتک۔ سیم آ باڑ خلوک ءِ۔ پاکستان آن دہشت گرد آتا ہِننگ نا سوج ہی ودی مفک۔ اگہ بھارتی وزیر داخلہ تون شاہدی اس ارے تو اودے او پیش کے۔ این ڈی ایس و را پاکستان ءِ تہہ آن نسخان تننگ کن کوشست کننگ ءُ انتئے کہ دشمن سیم تیان ننے نسخان تننگ کپک۔ او دے ٹکی و سویلی ہڑتوم آ کنڈآتیان ننکن ویل ودی کننگ خواہک۔ اسہ سوج اسے نا ورندی ٹی اوپارے کہ ننا غٹ ہمدردیک مقبوضہ کشمیر نا الس تون ءُ۔ پاکستان نا کنڈآن مقبوضہ کشمیر اٹی ہچ ءُ دخل اندازی اس مفننگ ءِ۔ اسہ سوج اسے نا ورندی ٹی اوپارے کہ بائیو میٹرک آن مہالو ہرا7ملین شناختی کارڈ جاری مس اوفتا جاچ ءِ ہلنگک ہراتم بائیومیٹرک نا نظام الوکہ تو جعلی شناختی کارڈ جوڑ مسکہ۔ او غٹ جعلی شناختی کارڈ آتے چٹفنگ اُن و اوٹی اوار آفیسر آتا برخلاف کارروائی کننگ اُن۔ جعلی شناختی کارڈ جوڑ کننگ اٹ اوار غٹ نادرا آفیسر آتے اینک کننگک۔ اسہ سوج اسے نا ورندی ٹی اوپارے کہ وزارت داخلہ نا کاریم جاست وپاست کننگ ءِ، نن وزارت خارجہ نا ساڑی گری ٹی جاست وپاست ءِ پورو کرسا پاکستان نا دورہ ءِ کروک آ ڈل ءِ مچ آ سرجم آتیان معلومدار کرینن۔ نورمقدم کیس انا بابت اسہ سوج اسے نا ورندی ٹی اوپارے کہ دا کیس اٹی دوبہ دارآتا پن ءِ ای سی ایل اٹ شاغنگانے۔ پاکستان دہشت گردی نا برخلاف جنگ اٹ 70آن 80ہزار جان تا قربانی ءِ تسنے۔ نن امن نا داعی اُن۔ اوغانستان نا تہہ نا سیاست تون ننا ہچ ءُّ تعلق اس اف۔ اوغانستان نا سلامتی پاکستان نا سلامتی کن المی ءِ۔ چمن نا کمک اٹ ہرا میوہ غاتا درآمد برآمد ہم بند ءِ۔ اوغانستان نا ویل ءِ اوغان تے ایسر کروئی ءِ۔ ننا کڑد بیرہ امن کن ءِ۔ نن امن کن جان تا نذرانہ ءِ پیش کرین۔ اوغان سفیر نا مسڑتون پیش بروک آ واقعہ نابابت سوج انا ورندی ٹی وزیر داخلہ پارے کہ اوغان سفیر نا مسڑ جرمنی آ ہنانے۔ او جاست وپاست اٹ کمک کتو۔ نن اونا فون نمبر و سرجم آتے خواہسونن ہرافتے ننے فراوان کننگتو۔
