اسلام آباد۔ 10اگست (اے پی پی) بنجائی وزیر حوالکاری و شینکاری چوہدری فواد حسین پارینے مست جنگ آک زور انا زی آ مسرہ داسہ السی سلاہ تا رداٹ جنگ کننگک، دہشت گردی نا برخلاف جنگ اٹی نن 70ہزار جان تا قربانی تسن ولے اینو اسکان اوڑآ ہچ ءُ کتاب اس نوشتہ کننگتو، میڈیا نامنظرنامہ بھلو حد اس اسکان تالان مسنے، اینو ڈیجیٹل میڈیا ایڈورٹائرمنٹ 25ارب روپئی اسکان سرمسنے، فیس بک و گوگل پاکستان آن 7.5ارب روپئی نا اشتہارآتا بزنس کریر، رجحان بدل مننگ ءِ، میڈیاٹی ٹیکنالوجی نا اڑاند نا سوب آن گڑاس جاگہ غاتیا ملازمت چٹا و گڑاس پوسکن ءُ ملازمت ودی مس، ننے تینا نکتہ نظر ءِ دنیا نا مون آ پیش کننگ و میڈیا ٹی شونداری کن ڈیجیٹل میڈیا غا چکار کروئی مریک، ملک اٹی ساڑی 42جرنلزم اسکول آتے ٹی 1960ء نا نصاب آتے خوانفنگ انگ ءِ وخت اس کہ پیشن نا دنیا ٹی لائٹس و ساؤنڈآتے ٹی مخلوق پی ایچ ڈی کرینو، ننتون داوڑنا بندغ اف۔ میڈیانا شونداری کن اولیکو وار میڈیا ٹیکنالوجی یونیورسٹی جوڑ کننگ انگ ءِ، میڈیا ٹیکنالوجی یونیورسٹی ٹی اینی میشن، ویژوئل ایفیکٹس، فلم جوڑ کننگ، کیمرہ ورک اتون اوار میڈیا نا چندی بشخ آتا بارواٹ تعلیم تننگک، میڈیا ٹی 1500انٹرن شپ تننگک، پی ٹی وی ءِ ایچ ڈی و ریڈیو نا نشریات آتے انٹرنیٹ آ گدریفنگانے۔ کیبل آپریٹرآتے کن ڈیجیٹل کیبل پالیسی اس منظور کننگا، کیبل آپریٹرآتے سرسہب ورناپروگرام نا رداٹ وام تننگک تانکہ او صارف آتے ڈیجیٹل کیبل فراوان کننگ کیر۔ داخیال آتا درشانی ءِ او نیشنل ڈیفنس یونیورسٹی نا نیشنل میڈیا ورکشاپ نا بشخ ہلوک آتون گپ وتران کرسا کرے۔ بنجائی وزیر حوالکاری پارے کہ میڈیا نا چندی وڑتا نیام اٹ پرخ چٹانے، اینو ٹی وی و اخبار نا جاگہ ءِ موبائل فون ہلکونے، داسہ موبائل فون ہی ننا اخبار، سوشل میڈیاو فلم نا ذریعہ ءِ۔ بنجائی وزیر حوالکاری پارے کہ پیمرا تون جرمانہ کننگ نا زیات آن زیات حد دہ لکھ روپئی ءِ، ساڑی آ دور اٹی خاص کر بھلا ادارہ غاتے کن دا جرمانہ مفننگ نا بریبر ءِ۔ اوپارے کہ دنیا ٹی داوڑمننگ کپک کہ سی این این امریکہ نا غٹ آن بھلا ٹی وی چینل مرے و او غٹ آن بھلا اخبارءِ ہم چلیفے۔ اوپارے کہ پاکستان اٹی گڑاس ہندن ءُ ادارہ ءُ ہرافک میڈیانا چینل جوڑ کریر ولے حقیقت اٹ اوفتا کاروبار پین اسے۔ میڈیا ادارہ غاتے ٹی سیٹھ انا کڑد انا سوب آن ہرامنظم میڈیا ءِ مون آ ہنوئی ئس او ہِننگ کتو۔
