مری۔9اگست (اے پی پی): ملک مستر ڈاکٹر عارف علوی ءِ لوگ بانک ثمینہ عارف علوی ءَگشتگ کہ پاکستان گرلز گائیڈ ایسوسی ایشن سرجمیں ملک ءِ جنکانی جوانیں تربیت کنگ ء ُ آیاناں چاگرد ءِ جوانیں شہری جوڑ کنگءِ ھاترءَ گامگیج کنگ ءَ اِنت، وانگ ءُ زانگ ءَ ہوار آیانی کرد سازگ ہم المی اِنت، جان ءُ سلامتیں ءُ زانتکاریں زالبول وتی لوگ ءُ ملکی دیمروئی ءَ حاسیں کرد پیلو کُت کنت۔ اے ھیالانی درشانی آئی ءَ پاکستان گرلز گائیڈ ایسوسی ایشن ءِ سروکی ءَ نیشنل سمر کیمپ ءِ گڈسری مراگش ءَ گوں تران کنان ء َ کتگ۔ آئی ءَ گشتگ کہ سوبمندیں سمر کیمپ ءِ بندوبست کنوکاناںمراد بات پیش کناں ء ُ کیمپ ءَ ہوار نودربرانی جزم ءُ روژنائیں دیم پاکستان جوڑ کنوکانی ہما واب ءِ معنا اِنت کہ آیاں پاکستان جوڑ کنگ ءِ ھاترءَ دیست بوتگ۔ آئی ءَ گشتگ کہ اے راج دپتر ءِ بہر جوڑ بوہگ ءِمول ء ُمراد چاگرد ءِ تہا زالبولانی کرد سازگ اِنت۔ اے تحریک زالبولاناں یک جوانیں شہری ءِ بستار ءَ آیانی زانت ء ُہنر ءَ پدر کنگ ءِ ھاتر ءَ موہ دنت۔
