اسلام آباد۔ 09اگست (اے پی پی) بنجائی وزیر حوالکاری چوہدری فواد حسین پارینے کہ الیکٹرانک وونٹنگ مشین گچین کاری تیٹی شفافیت نا گچین ءُ ذریعہ سے، گچین کاری تیٹی شفافیت نا بابت میکنزم اس تیارکروئی مریکم، ای وی ایم الیکشن کمیشن نا غٹ شڑت آتے پورو کیک، ٹیکنالوجی نا بابت غٹ کاریمک پورو ءُ، حکومت و اپوزیشن نا نیام اٹ امنائی سلاہ مس تو بروک آ گچین کاری تے ای وی ایم آ کرفنگ مریک۔ ای وی ایم نا کاریم اٹ اتنگ آن دھاندلی نا گمان کم مریک، گچین کاری نتیجہ غاک دمدستی دوئی مریرہ، داٹی الیکٹرانک ٹریل اتون پیپر ٹریل ہم دوئی مریک۔ داخیال آتا درشانی ءِ او ڈیجیٹل میڈیا ونگ اتون اسہ انٹرویو اسے ٹی کرے۔ بنجائی وزیر حوالکاری پارے کہ الیکٹرانک وونٹنگ مشین آ ننا زور داخاطرآن ءِ کہ دا انٹرنیٹ اتون گنڈوک اف، دا مشین ساڑی آ پیپر بیسڈ نظام آن اسہ گام اس مون آٹے، داٹی الیکٹرانک ٹریل اتون پیپر ٹریل ہم دوئی مریک۔ اوپارے کہ ایہن تو گچین کاری تیٹی وونٹنگ پنچ بجہ غا چٹک و ننے نتیجہ غاتا انتظار کن سہب اسکان انتظار کروئی تمک وخت اس کہ الیکٹرانک وونٹنگ مشین تا کاریم اٹ اتنگ آن گچین کاری تا نتیجہ دمدستی دوئی مریک و دھاندلی نا گمان ہم کم مریک۔ اسہ سوج اسے آ اوپارے کہ آزاد کشمیر نا گچین کاری تیٹی حکومت ن لیگ نا ئس، آزاد کشمیر نا وزیراعظم ن لیگ انا ئس، الیکشن کمیشن نا سینئر باسک ہم آزاد کشمیر نا وزیراعظم نا ہم زلف ئس، چیف الیکشن کمشنر نا تقرری ءِ ہم آزاد کشمیر حکومت تینٹ کرے وخت اس کہ پولیس انتظامیہ ہم اونا تابع ئس ولے ہراتم ن لیگ ءِ گچین کاری تیٹی شکست مس تو او پارے کہ دھاندلی مسنے۔ بنجائی وزیر حوالکاری پارے کہ آخر امر ءُ وڑوڈول اس اختیار کننگے کہ اوفتا دوبہ غاتے مر کننگ مرے۔ اگہ او گچین کاری تیٹی باایترہ تو پارہ کہ دھاندلی مسنے اوکٹرہ تو پارہ کہ گچین کاریک سہی مسنو، دابابت اسہ میکنزم اس تیار کروئی مریک ہراڑآن گچین کاری تا شفافیت آ سوج ہرفنگ مف۔ چوہدری فواد حسین پارے کہ وزیراعظم و پی ٹی آئی نا موقف ءِ کہ گچین کاری تیٹی شفافیت کن ٹیکنالوجی نا کنڈآ ہِننگے، ٹیکنالوجی نا کاریم اٹ اتنگ آن گچین کاری تیٹی فرسٹ ورلڈ انا وڑآ شفافیت بریک۔ گچین کاری تیٹی ای وی ایم نا کاریم اٹ اتنگ کن الیکشن کمیشن نا شڑت آتا بارواٹ گپ وتران کرسا بنجائی وزیر حوالکاری پارے کہ الیکشن کمیشن 36شڑت آتے مون آتخا و پارے کہ اگہ مشین اس دا36شڑت آتے پورو کیک تو او اودے گچین کاری تیٹی کاریم اٹ اتنگ مریک۔ اوپارے کہ نن ہراپوسکن آ ٹیکنالوجی ءِ ایسونن، او الیکشن کمیشن نا غٹ شڑت آتے پورو کیک۔ اسٹیک ہولڈر آتا گڑتی تابا بت بنجائی وزیر حوالکاری پارے کہ اسٹیک ہولڈر آتے ٹی الیکشن کمیشن و اپوزیشن جماعت آک اوار ءُ۔ دامشینک الیکشن کمیشن نا غٹ شڑت آتے پورو کننگ ءُ ہراڑسکان اپوزیشن نا تعلق ءِ تو اوفک داسکان دا ٹیکنالوجی ءِ اسل خنتنو۔ اوپارے کہ اپوزیشن اسہ وار دامشین تے ہرے ولدا تینا فیصلہ ءِ کے۔ اسہ پین سوج اسے نا ورندی ٹی چوہدری فواد حسین پارے کہ داوخت آ گچین کاری اصلاحات اٹی مسہ وڑنا ٹیکنالوجی تیا ہیت مننگ ءِ ہرافتے ٹی الیکٹرانک وونٹنگ مشین، انٹرنیٹ وونٹنگ مشین و بائیو میٹرک اوار ءُ، داہرمسٹ آک یکجا افس۔اسہ پین سوج اسے آ اوپارے کہ داوخت آ پنچ کمپنی ای وی ایم تیار کننگ ءُ ہراالیکشن کمیشن نا شڑت آتیا پورو سلرہ۔ داسہ قیمت ءِ طے کننگ نا معاملہ ءِ، ٹیکنالوجی نا بابت ہچ ءُ ویل اس مون تروک اف۔ اسہ پین سوج اسے آ اوپارے کہ دابابت کانودی شڑت آتا اِرابشخ ءُ، اسہ بشخ اس الیکشن کمیشن ءِ واکداری تننگ نا بابت ءِ۔ قومی اسمبلی آن دارداٹ بل اس منظور مسنے ہراداسہ سینیٹ اٹی ءِ۔ سینیٹ نا اِراکمیٹی داڑآ کاریم کننگ اٹی ءُ، سینیٹ نا پولیٹیکل کمیٹی اپوزیشن و حکومت نا باسک آتیا تالان ءِ ہراٹی دا بل آ شرہ مننگ ءِ۔ وخت اس کہ سینیٹ نا پارلیمانی افیئرز نا بارواٹ کمیٹی ٹی ہم دابل آ سجفنگ برجاءِ۔ اگہ سینیٹ اٹی دابل آ پین ترمیم برے تو دا دُوارہ قومی اسمبلی آ بریک و قومی اسمبلی ٹی داڑآ دُوارہ وونٹنگ مریک۔
