راولپنڈی۔ 09اگست (اے پی پی) بنجائی وزیر ریلوائی اعظم خان سواتی پارینے کہ بروک آ چین تے کچٹی آن پاک شفاف چاگڑد اس فراوان کننگ کن کلین اینڈگرین پاکستان وژن آ عملدرآمد برجاءِ، وزیراعظم عمران خان نا وژن نا رداٹ ٹین بلین سونامی ٹری ڈٹ انا رداٹ مچ آ ملک اٹی بھلو کچ اسے آ شجرکاری برجاءِ، زیات آن زیات شجرکاری نا سوب آن نن کلین اینڈ گرین پاکستان نا تغ ءِ پورو کننگ کینہ۔ داخیال آتا درشانی ءِ او دوشنبے نادے آ ریلوائی ہسپتال راولپنڈی و راولپنڈی ریلوائی اسٹیشن آ نیال اس خلسا ریلوائی نا بشام نا شجرکاری مہم نا بناءِ کننگ نا وخت آ گپ وتران کرسا کرے۔ بنجائی وزیر پارے کہ شجرکاری مہم اٹ ہرشاری زیات آن زیات بشخ ہلے و ننے زمور شاری اس مننگ نا شاہدی ءِ تروئی مریک۔ داکان مست وزیر ریلوائی اعظم خان سواتی ریلوائی ہسپتال راولپنڈی نا دورہ ءِ کرے و ہموڑے درمان مروک آ ناجوڑ آتا جان پڑسی تون اوار اوار چندی بشخ آتا معائنہ ءِ کرے۔ داوخت آریلوائی ہسپتال انتظامیہ بنجائی وزیر ءِ ہسپتال اٹ ریلوائی ملازم آتے تروک آ آسراتی تا بارواٹ حوال تس۔ بنجائی وزیر ہسپتال انتظامیہ ءِ ہسپتال اٹ ساڑی آسراتی تا آسان فراوانی نا پارت کرے و پارے کہ ریلوائی ہسپتال اٹ ناجوڑ آتے آسراتی تا فراوانی نا بارواٹ ہروڑنا ڈیوالئی سگ انا قابل مفک۔ ڈویژنل سپرنٹنڈنٹ ریلوائی راولپنڈی ڈویژن انعام اللہ محسود بنجائی وزیر ءِ پارے کہ ریلوائی راولپنڈی ڈویژن داکان مست بہاریہ شجرکاری مہم اٹی ہم ہدف آن زیات نیال خلک و داسہ بشام نا شجرکاری مہم اٹی ہم خورک انگا جاگہ غاتا پیدواری آن پد باضابطہ شجرکاری نا بناءِ کننگانے و برجاشجرکاری مہم اٹی ہم تخوک آ ہدف نادوئی کننگ کن آفیسر آتے پارت جاری کننگانے۔ داوخت آ ریلوائی نا ایلو ڈویژنل آفیسر آک ہم ساڑی ئسر۔
