اسلام آباد۔7اگست (اے پی پی): بنجاھی وزیر اھوالکاری ءُ شنگ کاری چوہدری فواد حسین ءَ گوشت کہ سرجمیں دگنیا ءَ مرچی بیانیہ ءِ جنگ مڈگ بوھگ ءَ انت ، بیان ترند ءُ مھکم بہ بنت گڈا مئے ارزشت بیت، مزن وزیر عمران خان مدام میڈیا ءِ سر ءَ دلگوش ءُ بیانیہ ءَ را ترند کنگ ءِ سر ءَ زور پر دیگ ءَ انت۔ گوستگیں وزارت ءِ اھوالکاری ریاست ءِ بیانیہ ءِ مٹ ءَ حکمران پارٹی ءِ ترجمان بوتگ، ما اے کلچر ءَ را مٹ کتگ، مرچی وزارت ءِ اھوالکاری ریاست ءِ ترجمان انت، ما ایشی ءِ ارزشت ءِ تہ ءَ گیشی کتگ، مرچی پی ٹی وی، ریڈیو ءُ اے پی پی ءَ را ڈیجیٹل کنگ بوھگ ءَ انت، گوستگیں زمانگ ءَ وتی بن گپ ءَ را سرجمیں دگنیا ءِ دیم ءَ پیش کت نہ کتگ، گوستگیں وھد ءَ میڈیا ادارگ آنی دیمروئی ءِ واستہ ھرچی سرمایہ کاری کنگ لوٹیتگ بوتگ آ نہ بوتگ، اگان جنگ ءَ ما ستر ہزار جان آنی کربانی داتگ بلے ما دگنیا ءَ سئیگ ءُ سرپد کت نہ کتگ اے جنگ چیا بوتگ ءُ ما چے کربانی داتگ، پاکستان ءَ میڈیا ڈیجیٹلائز نہ بوتگ، سوشل میڈیا گیش سوگہو بوتگ، 1964 ءَ چہ پد مرچی 2021 ءَ پاکستان ءِ میڈیا ءَ درستاں چہ گیش ٹرانسفارمیشن بوھگ ءَ انت۔ اے ھیالانی درشانی آئی ءَ شمبے ءِ روچ ءَ وزارت ءِ اھوالکاری ءُشنگ ءِ چیر دستی ءَ نیشنل ڈیجیٹل انفارمیشن پلیٹ فارم ءِ بنگیجی مراگش ءَ گوں گشتانک دیان ءَ کت۔ مراگش ءِ ھاسیں مہمان صدر ءِ مملکت ڈاکٹر عارف علوی ات۔ صدر ءِ مملکت ءَ نیشنل ڈیجیٹل انفارمیشن پلیٹ فارم ءِ بنگیج کت۔ مراگش ءَ سپیکر راجی اسمبلی اسد قیصر ، بنجاھی وزیر انسانی حقوق ڈاکٹر شیریں مزاری، وزیر ءِ مملکت برائے اھوالکاری ءُ شنگ کاری فرخ حبیب، سینیٹ ءِ قائمہ کمیٹی برائے اھوالکاری ءِ چیئرمین سینیٹر فیصل جاوید، مزن وزیر ءِ مشیر برائے کیاسگری ءُ تہی کار شہزاد اکبر ءُ ہلال احمر ءِ چیئرمین ابرار الحق ءَ ھوار وزارت ءِ اھوالکاری ءُ شنگ کاری ءِ کلانہ ایں اپسرگ آں بھر زوری کت۔ بنجاھی وزیر اھوالکاری ءُ شنگ کاری چوہدری فواد حسین ءَ گوشت کہ پاکستان ءَ بازیں حکومت اتکگ انت بلے بھد بھتیءَ چہ ما وتی میڈیا ءِ ادارگ آناں ڈیجیٹل نہ کتگ، ایشی ءِ مٹ ءَ مئے کش ءُ کرے ملک آں وتی ٹرانسمیشن ءَ را ایچ ڈی ءِ سر ءَ ٹرانسفر کتگ۔ آئی ءَ گوشت کہ وزارت ءِ اھوالکاری ءِ چیر دستی ءَ بست ءُ بند کتگیں ادارگ آناں ڈیجیٹلائزیشن ءِ اے کار ءَ پاکستان ءِ بیانیہ ءَ دیمروئی رسیت ءُ ریاست ءِ بیانیہ مھکم بیت۔ آئی ءَ گوشت کہ مرچی پی ٹی وی ایچ ڈی بوھگ ءَ انت۔ ریڈیو ءِ شنگ ءُ تالانی انٹرنیشٹ ءِ سر ءَ ٹرانسفر ءِ سر ءَ روگ ءَ انت۔ راجی ھال رسانکی ادارگ ایسوسی ایٹڈ پریس آف پاکستان (اے پی پی) ءِ وجود 1902 ءَ چہ جوڑ انت۔ اے پی ءَ را مرچی ڈیجیٹل نیوز ایجنسی جوڑ کنگ بوتگ، رائٹرز، اے ایف پی ءُ دگنیا ءِ ایندگر ٹوھیں ایجنسی آنی وڑ ءَ اے پی پی ڈیجیٹل نیوز ایجنسی ءِ وڑ ءَ آڈیو، ویڈیو، پریس ءُ پرنٹ میڈیا ءَ وتی ازمت آں پیلو کت کنت۔ بنجاھی وزیر اھوالکاری ءَ گوشت کہ پاکستان ءَ ایڈورٹائزمنٹ ءِ درستاں چہ مستریں کلائنٹ حکومت ءِ پاکستان انت، ما پی آئی ڈی ءَ را پیپر لِس کتگ، اشتہار آنی سرجمیں کار سد درسد کمپیوٹرائزڈ ءُ پیپر لِس انت۔ ملک ءِ تاریخ ءَ درستاں چہ پیسر اولی رند ءَ ما اشتہار آنی رد ءَ توامیں ادائیگی سرجم کتگ انت، مرچی یک کلدارے ھم وام ادا نہ بوتگ۔ آئی ءَ گوشت کہ گوستگیں سئے ماہ ءِ ساھ ت ءَ ما 7 کروڑ کلدار ءِ وام داتگ، اے وام آں چہ ھال تاک ءُ میڈیا ءِ باسک آنی آسراتی ءَ کمک رس ایت۔ بنجاھی وزیر اھوالکاری ءَ گوشت کہ حکومت ءَ کیبل آپریٹرز ءِ واستہ ڈیجیٹل پالیشی منظور کتگ، ھما کیبل آپریٹرز کہ ڈیجیٹل کیبل سروس پجاری کت نہ کناں، آواناں کامیات ورنا پروگرام ءِ چیر دستی ءَ وام دیگ بہ بیت تانکہ آ کیبل ءَ را ڈیجیٹلائز کت بکن آں۔ چوہدری فواد حسین ءَ گوشت کہ وزارت ءِ اھوالکاری ءَ انفارمیشن ءَ ابید ٹیکنالوجی ءِ ھم ٹوھیں بھر ءِ است انت۔ ما وزارت ءِ اھوالکاری ءُ شنگ کاری ءِ نام ءَ مٹ ءُ بدلی کنان ءَ میڈیا منسٹری جوڑ کنگ ءِ ھوالگ ءَ چار ءُ تپاسی کنگ ءَ انت۔ آئی ءَ گوشت کہ 2018 ءَ وھد ءِ وزارت ءِ اھوالکاری ءِ قلمندان ءِ سیٹ ءَ نشت آں گڈا ابکہ بوتاں کہ یک سیاسی پارٹی پاکستان تحریک انصاف ڈیجیٹل میڈیا ءَ حکومت ءَ چہ دیم بوتگ، سیاسی حکومت ءِ فرض انت کہ آ مردم آنی دیم ءَ پسو بہ دنت، مردم آنی جست آنی پسو ءَ بہ دنت ءُ آئی ءِ شک ءُ پک دور کنگ ءِ اہلیت بہ بیت۔ آئی ءَ گوشت کہ سوشل میڈیا ءِ سر ءَ حکومت ءِ اینکیاس ٹوھیں ساڑی بوھگ ایشی ءَ چہ پیسر اچبر نہ بوتگ، ھمینچوک کہ مرچی انت۔ بنجاھی وزیر اھوالکاری ءُ شنگ کاری ءَ گوشت کہ مئے کرا بنی آدمی آسراتی ءِ کمی بوتگ، مئے کرا لائٹس، سائونڈزءِ شوبگ ءَ پی ایچ ڈیز نہ بوتگ، ما اے مول ءُ مراد ءِ واستہ نیشنل مڈیا یونیورسٹی ءِ منصوبگ بندات کتگ، اے یونیورسٹی ءِ چار سکول انت ایشانی تہ ءَ سکول آف اینی میشن اینڈ میڈیا ٹیکنالوجی، سکول آف میڈیا اینڈ کمیونیکیشن ، سکول آف پرفارمنگ آرٹس ءُ سکول آف فلمز اینڈ براڈ کاسٹنگ ھوار انت۔ ما اے یونیورسٹی ءِ بنگیج ءَ ھمے ماڑی ءَ چہ کنگ ءَ آں۔
