تہران۔5اگست (اے پی پی):چیئرمین سینیٹ محمد صادق سنجرانی ءَ پارلیمانی ڈل ءِ ھمبراھی ءَ نوک گچین بوتگیں صدر سید ابراہیم ریئسی ءَ گوں تہران ءَ گند ءُ نند کت۔ گند ءُ نند ءِ ساھت ءَ دوئیں سروک آنی نیام ءَ پاکستان ایران یکوئی دمگی دیمروئی، اقتصادی کمک ءُ پارلیمانی روگ ءُ آیگ آناں گیش مھکم کنگ ءِ بابت ءَ ھیال ریچی کنگ بوت۔ چیئرمین سینیٹ ایران ءِ نوک گچین بوتگیں صدر ءِ سوگند چست کنگ ءِ مراگش ءَ بھر زوری ءِ ھاترا دو روچی تر ءُ تاب ءِ ھاترا ءَ ایران ءَ انت۔ چیئرمین سینیٹ ءَ را مزن وزیر پاکستان عمران خان ءَ سوگندی مراگش ءَ پاکستان ءِ نماھندگی ءِ واستہ نامینتگ بوتگ۔ نوک گچین بوتگیں صدر ءَ گوں گند ءُ نند ءِ ساھت ءَ پاکستان ءُ ایران ءِ نیام ءَ پارلیمانی روگ ءُ آیگ آناں گیش مھکم کنگ ءُ اقتصادی یکوئی آناں برجا کنگ ءِ سر ءَ تپاک کنگ بوت۔ چیئرمین سینیٹ ءَ اے موہ ءِ سر ءَ ایران ءِ نوک گچین بوتگیں صدر ءِ واستہ پاکستانی راج، پارلیمان، صدر ءُ مزن وزیر ءِ نیمگ ءَ نیکیں واھگ آنی درشان کت ءُ گوشت کہ آئی ءِ سروکی ءَ پاکستان ءُ ایران ءِ نیام ءَ کوھنیں ، نیک راھی، دود ءُ ربیدگی ءُ تجارتی یکوئی گیش مھکم بنت انت۔ چیئرمین سینیٹ ءَ گوشت کہ کشمیر ءِ وت واجئی ھک ءِ ھمبراہ داسری ءُ کشمیری آنی لگت مالی ءَ را گر ءُ دار ءِ واستہ میاں اوستمانی برات آناں یکجائی کرد پیلو کنگ لوٹ ایت۔ کشمیر آناں وت واجئی ھک ءِ بابت ءَ ایران ءِ حمایت ءِ پد ءَ ایرانی سروک آنی شگر ءُ منت واری گپت۔ دوئیں ملک آںی نیام ءَ تجارت ءِ دیمروئ ءِ واستہ بلوچستان ءِ سیم سرئی دمگ آناں گیش تجارتی کشک ءِ پچ کنگ ءُ سیم سر آنی سر ءَ منڈی ءُ بازار جوڑ کنگ ءِ ضلورت انت۔ آئی ءَ گوشت کہ ایران ءَ گوں بلوچستان ءِ سیم سرئی دمگ ، تربت، پنجگور ءُ مکران ڈویژن ءَ را یک سل ءَ توان ءِ پجاری ءَ را دل یکیمی کنگ ءِ دزبندی ھم کت۔ اے موہ ءِ سر ءَ ایرانی صدر ءَ گوشت کہ دمگی تجارت ءِ دیمروئی ءِ ھاترا استیں پینگ آناں دور کنگ ءُ بلوچستان ءِ دمگ ءَ را یک شل ءَ توان ءِ پجاری ءِ واستہ استیں جیڈھ آناں گیوار کنگ بہ بیت۔
