اسلام آباد۔ 03اگست (اے پی پی) بنجائی وزیر اقتصادی امور عمرایوب خان تون ورلڈ بینک انا نائب صدر ہارٹ وِگ شیفر اوڑدہی کرینے۔ وزارت اقتصادی امور نا کنڈآن جاری بیان نا رداٹ داوخت آ نائب صدر ورلڈ بینک ہارٹ وگ شیفر حکومت نا زرگزرانی و اصلاحات نا پالیسی تا ستاءِ کرے۔ عمرایوب خان خیبرپختونخوا ٹی خلقی آ سڑک و ڈیجیٹل انفراسٹرکچر ءِ گچین کننگ نا سلاہ پیش کرے۔ اوپارے کہ ڈیجیٹلائزیشن آن مرمرانگا علاقہ غاتے ٹی زرگزرانی وارخواہی و روزگار نا ودفنگ اٹ کمک ایتک۔ وزیر عمرایوب خان مستی پارے کہ پاکستان اٹ آئی ٹی انڈسٹری و دانا برآمد آتے ٹی ودکی نا بھلو وارخواہی اس ساڑی ءِ۔ وزیر اقتصادی امور کے پی نا اوار مروک علاقہ غاتے ٹی سڑک آتا نیٹ ورک و بجلی نا بشخنگ ءِ گچین کننگ نا ہم سلاہ تس۔ عمرایوب خان کشاری مصنوعات آتے کن کولڈ سٹوریج جوڑ کننگ و ویلیو ایڈیشن ءِ ودفنگ نا گرج آتیا ہم زور شاغا۔
