کوئٹہ۔ 03اگست (اے پی پی) صدر مملکت ڈاکٹر عارف علوی پارینے کہ بلوچستان خیسن تا گل زمین ءِ، و مخلوق خواری کش ءُ، داڑے کشاری پیدوار اٹی ودکی تون اوار اوار دیر انا کاختی نا مون ءِ توننگ ہم المی ءِ ہراڑکن خیالداری و گچین حکمت عملی نا ٹہیفنگ المی ءِ، بلوچستان اٹی کشت وکشار نا مون آ دننگ کن گرین ٹریکٹر پروگرام تون اوار ایلو برجاڈٹ آک پائیدار کشاری شونداری نا ضمانت ءُ۔ داخیال آتا درشانی ءِ او سے شنبے نادے آ داڑے ”بلوچستان گرین ٹریکٹر پروگرام“ نا بنائی دود آن تران کرسا کرے۔ داوخت آ گورنر بلوچستان سید ظہور احمد آغا، وزیراعلیٰ بلوچستان جام کمال خان، صوبائی وزیر کشت وکشار انجینئر زمرک خان اچکزئی ئسک ہم ساڑی ئسر۔ صدر مملکت پارے کہ بلوچستان قدرتی وسیلہ غاتیان شپ ءُ صوبہ اسے وخت اس کہ لائیو اسٹاک اٹی جم ملکی پیدوار اٹی اسہ بھلو حصہ دار ءِ۔ ساہدار توننگ و کشت و کشار پیغمبرآتا کسب ءِ و دا ہڑتوم آ کسب آک انسانی تاریخ تون وابستہ ءُ وخت اتون اوارا وار انسانی کچ ودا تو کشت وکشار نا مون آ دننگ و شونداری کن ہم پوسکن ءُ وڑوڈول مون آ بس و شونداری نا داچرجوئی وخت اتون برجاءِ ساڑی آ دور اٹی اسپرے ایریگیشن، واٹر چینل و ڈرپ ایریگیشن نا کمک اٹ پوسکن آ وڑوڈول آتے اٹ کشاری شونداری مننگ کیک اوپارے کہ ویتنام نا کوسٹل ایریا بلوچستان آن ہم چنک ءِ و بنائی وڑاٹ فشریز نا بشخ اٹی پاکستان و ویتنام نا ایکسپورٹ مسٹ آن چار سد ملین ڈالر ئسر ویتنام افزائش فشریز آ گچین حکمت عملی و یکسوئی اٹ کاریم کرے و اینو او تینا ایکسپورٹ ءِ مسہ سد ملین ڈالر آن 10بلین ڈالر اسکان درینے۔ لائیو اسٹاک ءِ شون ترسا اسہ بھلو زرمبادلہ اس کٹیا کننگ مریک،بیرہ چین سالانہ 70ارب ڈالر نا حلال سُو امپورٹ کیک پاکستان نا گڑاس علاقہ غاتے ٹی ساہدار تے ٹی مروک آ کھر و منہ انا ناجوڑ نا مون ءِ تورسا حلال سُو انا ایکسپورٹ ءِ بھاز ودفنگ مریک۔ بلوچستان نا شونداری کن داجاگہ نا گچین مروک آ اسمبلی نا باسک آتے سہی سمت اٹ فیصلہ کرسا پائیدار شونداری نا چرجوئی کن تینا متحرک کڑد ءِ ادا کروئی مریک اوپارے کہ مستین اٹ بلوچستان نا معدنی وسیلہ غاتا بابت غلط فیصلہ کننگا ولے ساڑی حکومت گچینی کن گام گیج کننگ ءِ و اومیت ءِ مستین نا دا باندات آتے زوت ایسر کننگک۔ صدر عارف علوی پارے کہ بلوچستان تون است اٹ مہرومریبت ءِ و ہروار دورہ کوئٹہ نا وخت آ آبی حالیت آتیا گپ وتران کننگ ءِ المی تکیوہ کہ داہیت است بڈ ءِ کہ بلوچستان حکومت دااہم ویل آ پورو سنجیدگی اٹ کاریم کننگ ءِ۔ وزیراعلیٰ بلوچستان پارے کہ کوئٹہ ٹی ہڑدے ئی نا آبی گرج 20ملین گیلن ءِ و کاریم اٹ اتوک آ دیر ءِ دُوارہ کاریم اٹ اتنگ نا قابل جوڑ کننگ کن ری سائیکلنگ نا ڈٹ آتیا کاریم برجاءِ، بلاشبہ صوبائی حکومت نا دا گام گیج آخبت اٹ آبی گرج آتے پورو کننگ اٹ کمکار مریک۔ اوپارے کہ لائیو اسٹاک کشت وکشار و معدنی وسیلہ غاتے سہی وڑاٹ استوار کرسا زرگزرانی و اقتصادی شونداری و روزگار نا فراوانی نا پوسکن ءُ وارخواہی ودی کننگ مریک۔ سندھ انا علاقہ تھر دانا پیدوار درور ءِ ہراڑے کولاپیش تمنگ آن مست مخلوق نا سیبو پِر انا دیر آن مروک آ فصل آتیا ئس و خشک سالی نا حالیت آتے ٹی مخلوق نا اسہ بھلو کچ اس ہموکان ہمپیکہ۔ ولے کولا نا کانڑتیان پد داسہ حالیت آک یکسر بدل ءُ۔ صدر مملکت پارے کہ کورونا دین انا جہانی دین اٹی ہمسایہ ملک آتون اوار شون ہلوک ملک آتا زرگزران توس ولے پاکستان نا گچین حکمت عملی نا سوب داڑے نسخان نا جم کچ ایلو ملک آتا مقابلہ ٹی کم ئس۔ الحمداللہ عالم دین، میڈیا و غٹ تپہ فکر انا مخلوق نا کمک اٹ کورونا دین انا بھلو حداسسکان مون ءِ توننگ اٹ سرسہب مسونن۔ نن مشکل حالیت آتے وارخواہی تیٹی بدل کرسا داڑآن فائدہ ہرفنگ کینہ۔ حکومت نا کاریم شونداری نا پوسکن ءُ کسر پٹنگ نا ءِ اینو ایموزون تون اوار چندی وارخواہی تا سوب آن چنکا کہول آ ہم کاریم کننگ مریک۔ صدر مملکت ڈاکٹر عارف علوی پارے کہ ملک انا مچ آ انسٹی ٹیوشن تے دیمک لگاکہ عمران خان کرپشن نا مون ءِ توننگ کن سنجیدہ و پبی گام گیج کرینے۔ حکومت کرپشن نا مون ءِ تو تہوکہ تو پیسہ غاتا منہ بندغ آتا کمک اٹ پیشن نا ملک آ گدریفنگ نا عمل برجاسلیسکہ۔
