اسلام آباد۔ 02اگست (اے پی پی) چیئرمین سینیٹ محمد صادق سنجرانی پارینے کہ پاکستان نا غٹ مسلم ملک آک و خاص وڑاٹ عرب ملک آتون برادرانہ و بے مٹ تعلقداری ءِ و پاکستان کن عرب پارلیمنٹ عرب ملک آتا اسیجائی پلیٹ فارم اس مننگ نا سوب آن بھاز اہمیت تخک، پاکستان عرب پارلیمنٹ اٹ مبصرنا حیثیت اٹ اوار مننگ کن تیار ءِ۔ داخیال آتا درشانی ءِ چیئرمین سینیٹ محمد صادق سنجرانی عرب پارلیمنٹ نا صدر عادل بن عبدالرحمان العسومی نا کماشی ٹی پاکستان نا پنچ دے ئی دورہ ءِ کروک آ ڈل اتون پارلیمنٹ ہاؤس اٹ اوڑدہی ٹی کرے۔ محمد صادق سنجرانی پارے کہ پاکستان عرب ملک آتون ہڑتوم آ کنڈآتا تعلقداری ءِ بھاز اہمیت ایتک۔ عرب پارلیمنٹ نا جم اٹنگا کڑد ستاکڑزک۔ اوپارے کہ عرب پارلیمنٹ عرب ملک آتون کمکاری ءِ ودفنگ نا وارخواہی فراوان کیک و پارلیمانی رابطہ کاری آخبت نا کمکاری کن پوسکن ءُ کسر اس آوار کیک البتہ ویل آتے سمجھنگ و ایسراس کشنگ کن بین الپارلیمانی رابطہ کاری ٹی پین ترندی اتنگ نا گرج ءِ۔ چیئرمین سینیٹ پارے کہ پاکستان مسلم امہ نا حق انا رکھ اکن عرب ملک آتون تعلقداری تے قدر انا نظراٹ ہرک و ڈیہہ نا رابطہ کاری ءِ ودفنگ کن پاکستان عرب دنیاتون رابطہ کاری نا گام گیج و ڈٹ آتے اہم تکک۔ چیئرمین سینیٹ پارے کہ باندات آتے ٹی گچینی کن عرب پارلیمنٹرین کن کانودسازی نا بابت ہیلکاری پروگرام اس شین تننگ مریک۔ عرب ملک آک و پاکستان نا نیام اٹ واپار و زرکاری نا بابت گپ وتران کرسا چیئرمین سینیٹ پارے کہ زرکاری، واپار و افرادی قوت نا بشخ آتے ٹی کمکاری کن بھلو گنجائشت اس ساڑی ءِ۔ اوپارے کہ نن پائیدار شونداری آ باور کینہ و پاکستان نا خارجہ پالیسی، رابطہ کاری، شریداری شونداری و راجی و اقتصادی شونہالی و امن نا کلہو آ منحصر ءِ۔ عرب پارلیمنٹ نا ڈل اتون اوڑدہی ٹی چیئرمین سینیٹ فلسطین نا ویل و کشمیرنا ویل انا بابت سرجم گپ وتران کرسا پارے کہ پاکستان فلسطینی تا رواحق انا مخ تفی ءِ مدام برجاتخک و جہانی کانود نا رداٹ آجو و وتواجہ فلسطینی ریاست نا موقف آ سلوک ءِ۔ محمد صادق سنجرانی پارے کہ پاکستان مظلوم فلسطینی تتون تفوک ءِ و ہچ ءُ حالیت اسے ٹی اسرائیل ءِ تسلیم کپک۔ چیئرمین سینیٹ پارے کہ فلسطینی تیانبار مظلم کشمیریک ہم مسلم امہ نا کنڈآ ہُننگ ءُ۔ فلسطین و کشمیر نا ویل انا سوب آن عالم اسلام و عرب ملک آتے ٹی بے چینی و غصہ نا فضاءِ۔ اوپارے کہ کشمیر نا ویل انا ایسری اقوام متحدہ نا قراردادآتا رداٹ مریک ہرا ڈیہہ و علاقائی امن وسلامتی نا ضامن ءِ۔ عرب پارلیمنٹ نا صدر عادل بن عبدالرحمان العسومی پارے کہ پاکستان نا دورہ ءِ کرسا بھاز خوشی محسوس مسنے وپاکستان عرب ملک آتیکن بھاز اہم ءِ۔ اوپارے کہ اقتصادی شونداری و راجی شونہالی ننا اسیجاعزم ءِ و ہنداڑتون مون آ کانہ۔ دورہ پاکستان آن پارلیمانی کمک، ادارہ جاتی رابطہ و کثیر الجہتی کمکاری کن کسرتے آوار کننگ اٹ کمک رسینگک۔
