اسلام آباد۔ 02اگست (اے پی پی) وزیرخارجہ مخدوم شاہ محمود قریشی پارینے کہ پاکستان، جھیڑہ غاتا دیرپا سیاسی ایسری کن مذاکرات ءِ اسٹ انگا کسر تکک، پاکستان، فلسطین و کشمیر نا ویل آتا پرامن ایسری نا خواہندار ءِ۔ داہیت ءِ او پاکستان نا دورہ غا بروک آ عرب پارلیمنٹ نا صدر عادل بن عبدالرحمان نا کماشی ٹی عرب پارلیمانی ڈل اتون گپ وتران کرسا پارے ہرا دوشنبے نادے آ وزارت خارجہ ٹی اوڑتون عرب پارلیمانی ڈل انا وزارت خارجہ ٹی اوڑدہی کرے۔ وزیرخارجہ پارے کہ عرب پارلیمنٹ، لیگ آف عرب سٹیٹس نا اہم ءُ ادارہ اسے، پاکستان نا عرب ملک آتون تعلقداری، اسہ وڑ مذہبی، دودوربیدگی و تاریخی قدر انا بنداو آ ٹی ءِ۔ شاہ محمود قریشی پارے کہ پاکستان نا عرب پارلیمان نا باسک ملک آتون گچین ہڑتوم آ کنڈآتا تعلقداری ءِ، ننا دے ٹک نیامی نا ملک آتون ہڑتوم آ کنڈآتا تعلقداری ءِ۔ اوپارے کہ پاکستان دے ٹک نیامی ٹی امن و سوگوی نا خواہندار ءِ، او آئی سی نا بانی باسک مننگ نا ناطہ، نن اتحاد امہ ٹی مثبت کڑد ادا کننگ کن سنبرینگوک اُن۔ وزیرخارجہ پارے کہ پاکستان، جھیڑہ غاتا دیرپا سیاسی ایسری کن مذاکرات ءِ اسٹ انگا کسر تکک۔ شاہ محمود قریشی پارے کہ ننا اقتصادی اولیت آتے ٹی رابطہ غاتا مون آ دننگ، شونداری و شونہالی ٹی شریداری، زرگزرانی و معاشرتی ارتقاء، و امن و سوگوی کن کوشست آک اوار ءُ۔ پاکستان، دے ٹک نیامی ٹی امن کن فلسطین نا ویل انا ساف ایسری ءِ المی تکک۔ پاکستان نا فلسطین نا ویل انا بابت موقف، پیدوار و دوٹوک ءِ۔ وزیرخارجہ عرب پارلیمانی ڈل ءِ مقبوضہ جموں و کشمیر اٹی برجاانسانی حق انا بھلا خلاف ورزی و بھارتی پالیسی تا سوب آن ڈیہہ نا امن ءِ مون تروک خطرہ غاتیان معلومدار کرے۔ ضرورت داہیت انا ءِ کہ جہانی برادری، مقبوضہ جموں و کشمیر اٹی بھارت نا کنڈآن کروک آ، 5اگست 2019ء نا اسہ کنڈی، غیرآئینی گام گیج آتا ترندی اٹ مذمت ءِ کے۔
