اسلام آباد۔ 02اگست (اے پی پی) بنجائی وزیر داخلہ شیخ رشید احمد پارینے کہ ن لیگ و شن لیگ نا مفاہمت و مزاحمت نا جنگ ءِ، ہڑتوم آ پالیسیک بے سہب مریرہ، اوغانستان نا سیم آن مہاجرآک بفننگ ءُ، اسلام آباد انتظامیہ ءِ غٹ نالہ غاتیا تجاوزات آتے بِٹنگ نا پارت کرینن، کورونا ویکسی نیشن نا سرٹیفکیٹ نا جاری کننگ برجاءِ، سفارت خانہ غاتے ٹی کیہی سال آتیان تولوک 64آفیسر آتے پدی بٹنگانن، ہراآفیسر 30اگست اسکان پدی بفک اودے نوکری آن کشنگک، چینی باتی تا سیکورٹی کن غٹ بست وبند آک پورو ءُ، غیرکانودی شناختی کارڈ جوڑکروک آک ہچ ءُ حالیت اسے ٹی نادراٹی مفسہ، داتم اسکان اوغان سیم آن اوغان مہاجرآک بفننگ ءُ۔ داخیال آتا درشانی ءِ او دوشنبے نادے آ داڑے پریس کانفرنس آن تران کرسا کرے۔ بنجائی وزیر پارے کہ محرم الحرام اٹ امن و ایمنی ءِ برقرار تخنگک۔ اوپارے کہ نادرا کوویڈ سرٹیفکیٹ جاری کننگ نا فیصلہ کرینے، سمندر آن ایپار رہینگوک آ پاکستانی یا ہندی بندغ آک تینا کوویڈ نا نمبر ءِ خلسا نادرا سرٹیفکیٹ ءِ جاری کرفنگ کیرہ۔ اوپارے کہ چیئرمین سی ڈی اے و چیف کمشنر اسلام آباد عامر علی احمد ءِ پارت کرینن کہ اسلام آباد اٹی 190پین کیمرہ خلیر۔ 1122نا بناءِ کننگ اُن۔ ای الیون اٹ ہراتم نوکاپ بس تو داڑے 1122نا سروس الوکہ۔ 1122ءِ پوسکن ءُ گاڈی تننگ اُن۔ اوپارے کہ چیف کمشنر اسلام آباد عامر علی احمد و ڈپٹی کمشنر حمزہ شفقات ءِ پارت کرینن کہ غٹ نالہ غاتیان تجاوزات آتے اسہ کنڈ کننگے و غٹ نالہ غاتے 30اگست اسکان کلیئر کننگے۔ ہولی فیملی ہسپتال اٹ پوسکن آوینٹی لیٹر وارڈ انا بناءِ کننگ اُن۔ کوویڈ نا خطرہ غاتیان بچنگ کن رکھی گام گیج المی ءِ۔ اوپارے کہ 64پیشن نا ملک آتے ٹی تولوک آفیسر آتے پدی بٹنگانن، اوفتا جاگہ غا میرٹ آ گیگ بدل بندغ آتے گدریفنگ انگ ءِ۔ اگہ دا آفیسر آک 30اگست اسکان پدی بتور تو اوفتے فارغ کننگک۔ اسہ سوج اسے نا ورندی ٹی اوپارے کہ نن 14اگست آن آن لائن ویزہ نا بناءِ کننگ اُن۔ داڑے ہرا ہزار آ مخلوق ساڑی ءِ اوفتے اسہ تُو انا چھوٹ ایتیوہ۔ اوپارے کہ چین ننا عظیم سنگت ملک ءِ۔ چین مدام خراب انگا وخت اٹ پاکستان تون تفینے۔ چینی شاری تیکن فول پروف سیکورٹی بست وبند ءِ۔ اسہ سوج اسے نا ورندی ٹی اوپارے کہ لال حویلی آ اِراوار سم کاری مسنے۔ راولپنڈی پولیس دانا جاست وپاست ءِ کننگ ءِ۔ اوپارے کہ نن اوغان بارڈرآ باڑ خلکونن۔ طورخم بارڈرآ مچ آ سسٹم ءِ خلنگ اُن۔ اوغان بارڈرآن اوغان مہاجرآک بفننگ ءُ۔ اسہ سوج اسے نا ورندی ٹی اوپارے کہ 844جعلی ہراشناختی کارڈ آک پیش تماسر غٹ ءِ بین کرینن۔ غیرکانودی شناختی کارڈ جوڑ کروک آک نادرا ٹی مفسہ۔ کورونا دین آن بچنگ کن ماسک انا بِیننگ المی ءِ۔
