اسلام آباد۔ 02اگست (اے پی پی) بنجائی وزیر حوالکاری و شینکاری چوہدری فواد حسین مچ آ ملک اٹی پیغام پاکستان ضابطہ اخلاق آ عملدرآمد نا پڑو ءِ ستاکڑزوک گوندسا پارینے کہ اسلام سلامتی، امن، رواداری، تحمل، سگ و بیدادی کپننگ نا مذہب ءِ۔ فرقہ وارانہ خار، سلہہ بند فرقہ وارانہ جھیڑہ و واک انا زور آ تینا نظریہ غاتے ایلوتیا مسلط کننگ نا موکل تننگ مفک۔ داخیال آتا درشانی ءِ او دوشنبے نادے آ داڑے وزیراعظم نا نمائندہ خصوصی مذہبی ہم آہنگی و دے ٹک نیامی و پاکستان علماء کونسل نا چیئرمین حافظ محمدطاہر محمود اشرفی تون اوڑدہی ٹی گپ وتران کرسا کرے۔ بنجائی وزیر حوالکاری پارے کہ حکومت ملک اٹ محرم الحرام اٹی امن و ایمنی کن ہرممکن گام گیج کننگ ءِ، دارداٹ پاکستان علماکونسل و متحدہ علمابورڈ انا ملک اٹ مذہبی ہم آہنگی و ایلمی نا مون آ دننگ کن کڑد ستاکڑزک۔ بنجائی وزیر حوالکاری پارے کہ ملک اٹی مذہبی ہم آہنگی نا مون آ دننگ کن میڈیا نا کڑد بھاز اہمیت تخک۔ اوپارے کہ گڑاس زموار ملک اٹ فرقہ واریت ءِ تہو تننگ کن ملک دشمن واکدار آتا دوتے اٹ گوازی کننگ ءُ داتینا عزم اٹ اسل سرسہب مفسہ۔ داوخت آ حافظ طاہر محمود اشرفی پارے کہ نفاذ شریعت نا پن آ واک انا کاریم اٹ اتنگ، ریاست نا برخلاف سلہہ بند جنگ و جھیڑہ، تخریب کاری و پھسات و دہشت گردی نا غٹ حالیت آک شریعت نا رداٹ حرام ءُ۔ اوپارے کہ غٹ مسلک آتا عالم و مشائخ و مفتیک پاکستان انتہاپسندانہ سوچ و شدت پسندی ءِ مسترد کیرہ۔ محرم الحرام اٹی امن و ایمنی ءِ ہرحال اٹ برقرار تخنگک۔ اوڑدہی ٹی ملک اٹ محرم الحرام اٹی امن و ایمنی ءِ برقرار تخنگ کن گام گیج و پیغام پاکستان ضابطہ اخلاق آ عملدرآمد نا بابت گپ وتران مس۔
