کراچی۔ 02اگست (اے پی پی) پاک بحریہ و میری ٹائم سیکورٹی ایجنسی اسیجائی آپریشن اٹی کراچی آن 180ناٹیکل میل مر سویل اٹی واپاری جہاز ایم وی سواری۔ایچ نا عملہ ءِ بچفیر۔ آئی ایس پی آر نیوی نا جاری کروک اعلامیہ نا رداٹ داواقعہ پاکستان نا سمندر نا خصوصی اقتصادی زون اٹی طغیانی و تیز تہو تا سوب آن پیش بس ہراٹی واپاری جہاز ڈبنگاسس۔ ڈبینگ انگ آن مست جہاز انا عملہ نا کنڈآن ہلہلہ ئی کلہو مون تننگا ہرا فتے اسہ خڑک آ مال بردار جہاز ایم ٹی ایلان وائٹل بنگ و عملہ نا 5باسک آتے دمدستی وڑاٹ بچفے۔ پاکستان میری ٹائم سیکورٹی ایجنسی ءِ واقعہ نا حوال ملنگ تون مہالو آن فضائی چاروکی آ سلوک پاک بحریہ نا ہوائی جہاز ءِ شکست نا جاگہ غا گدریفنگا داکان بیدس پی ایم ایس اے نا اسہ ہوائی و سمندری جہاز اسے ہم کمک کن دمدستی وڑاٹ روانہ کننگا۔ پاکستان نیوی و پی ایم ایس اے نا ہوائی جہاز بنائی وڑاٹ عملہ نا 8باسک آتا پیدواری ءِ کریر و اوکان پد اسہ لائف رافٹ اسے نا کمک اٹ عملہ نا پین 5باسک آتے بچفیر۔ ہوائی جہاز عملہ نا پین باسک آتا پیدواری نا حوال خڑک انا جہاز ایم ٹی دیش ابھیمان ءِ تس ہراباسک آتے سرسہبی اٹ ریسکیو کرے۔ پاکستان نیوی و پی ایم ایس اے نا کوشست آتے ٹی داتم اسکان عملہ نا 18آن 15باسک آتے بچفنگانے وخت اس کہ 3باسک آتا پٹنگ کن پاک بحریہ و پی ایم ایس اے نا ہوائی و بحری جہاز سرچ آپریشن ءِ برجاتخانو۔ ڈبینگوک آ جہاز انا غٹ عملہ نا تعلق شام آن ءِ ہرابھارت آن واپاری گڑااتسا صومالیہ غا ہناکہ۔
