اسلام آباد۔ 02اگست (اے پی پی) ترجمان دفترخارجہ اوغانستان اٹی اوغان حکومت نا سرپرستی ٹی امن عمل نا کمک اٹ امن و سوگوی نا بابت وزیرخارجہ شاہ محمود قریشی نا بیان نا وضاحت ءِ کرسا داہیت آ است ہسونی نا درشانی ءِ کرینے کہ سوشل میڈیا ٹی وزیر خارجہ نا بیان ءِ بدل سدل کرسا پین وڑ پیش کننگا۔ دوشنبے نادے آ ترجمان داعش و طالبان تا بابت میڈیا نا اسہ سوج اسے نا ورندی ءِ ترسا اوغانستان اٹی امن و سوگوی نا بابت وزیرخارجہ نا بیان ءِ غلط پیش کننگ آ است ہسونی نا درشانی ءِ کرے و پارے کہ وزیرخارجہ نا ریمارکس ءِ ہچ ءُ حالیت اسے ٹی اوغان جھیڑہ ٹی خاص ءُ فریق اسے نا وکالت نا وڑاٹ ہلنگپ۔ترجمان پیدوار کرے کہ حقیقت اٹ، وزیرخارجہ دہشت گردی نا لعنت نا برخلاف جہانی برادری، علاقائی گوازی گر و تینٹ اوغان تا نیام اٹ امنائی سلاہ ودی کننگ نا بابت ہیت کرے۔ ترجمان پارے کہ نن وار وار آ پیدوار کرینن کہ پاکستان نا اوغانستان اٹی ہچ فیورٹ اس اف۔ نن جھیڑہ نا غٹ فریق آتے اوغان تکنہ، ہرافتے تینا آخبت نا تینٹ فیصلہ کننگ نا گرج ءِ۔ ترجمان پارے کہ پاکستان اوغان امن عمل اٹ تعمیراتی کمکاری نا کڑد ءِ برجاتخک۔
