اسلام آباد۔ 02اگست (اے پی پی) مچ آ ملک انا 68ضلع غاتے ٹی پولیو تور مہم بناکرینے۔ مہم اٹی 5سال آن کم وئی نا 2کروڑ 30لکھ چناتے پولیو آن بچفنگ نا پڑی کنفنگ نا ہدف مقرر کننگانے ہراٹی اسہ لکھ 79ہزار پولیو ورکرزکورونا دین آن بچفنگ نا رکھی گام گیج آتون اُرااُراغا ہنسا چناتے پولیو آن بچفنگ ننا پڑی کنفرہ۔ وزارت جان جوڑی آن جاری بیان نا رداٹ چناتا قوت مدافعت کن ہرپولیو مہم اٹی پڑی کنفنگ المی ءِ ہنداخاطرآن غٹ لمہ و باوہ تینا درگہ غاتیا فرنٹ لائن ورکرآتے بخیراٹ پار و تینا 5سال اسکان نا وئی نا چناتے پڑی ضرور کنفر وخت اس کہ دا چرجوئی ٹی ٹول فری جان جوڑی رکھ ہیلپ لائن 1166و 24گھنٹہ وٹس ایپ ہیلپ لائن 03467776546آ لمہ و باوہ نا پبی راہشونی ءِ کننگک و پولیو ویکسین کُننگ آن محروم رہینگوک آ چناتے پڑی کنفنگ کن ہیلپ لائن آ رابطہ کیر۔ وزارت جان جوڑی لمہ و باوہ غاتیان خواست کرینے کہ او سوج یا غاواسے نا حالیت اٹ پولیو ہیلپ لائن آ دمدستی رابطہ کیر۔ وزارت جان جوڑی پارے کہ پولیو آن چناک مچ آ زند معذور مریرہ حتی کہ چناتا مرک ہم واقع مریک ہنداخاطرآن 5سال آن کم وئی نا چناتے پولیو نا پڑی کنفسا داہلوک آ دینءِ تالانی آن بچفنگ مریک ہنداخاطرآن پولیو تور مہم اٹ زیات آن زیات بشخ ہلنگ ننا غٹ انا قومی فرض ءِ۔
