اسلام آباد۔ 30جولائی (اے پی پی) بنجائی وزیر حوالکاری و شینکاری چوہدری فواد حسین پارینے کہ پاکستانی سرکڑدہ غاک وغانستان اٹی امن نا خواہندار ءُ، اوغانستان نا بارواٹ ننا پالیسی پیدوار ءِ، نن اوغانستان اٹی اسہ پڑک اسے نا مخ تفییا اودے سوگو کپننگ اُن بلکن اسہ ہندن ءُ چاگڑد اس جوڑ کننگ نا کوشست کننگ اُن کہ ہراٹی اوغانستان نا غٹ پڑک آک اسہ ایلو تون تولسا امنائی حکومت اس جوڑ کننگ کیر، نن ڈیہہ ٹی اقتصادی وواپاری رابطہ غاتے مون آ دننگ خوانہ، نیامی ایشیائی ریاست آتسکان رسینگ نا سیبو سوگو اوغانستان آٹے۔ داخیال آتا درشانی ءِ او پاک اوغان یوتھ فورم نا کنڈآن اڈ ہلوک آ دود آن تران کرسا کرے۔ چوہدری فواد حسین پارے کہ اوغانستان نا بارواٹ پاکستان نا پالیسی پیدوار ءِ، نن اوغانستان اٹی اسہ پڑک اسے نا مخ تفییا اودے سوگو کپننگ اُن بلکن اسہ ہندن ءُ چاگڑد اس جوڑ کننگ نا کوشست کننگ اُن ہراٹی اوغانستان نا غٹ پڑک آک اسہ ایلو تون اواری اٹ تولسا امنائی حکومت اس جوڑ کننگ کیر۔ دااسٹ انگا کسر ءِ ہرانا کمک اٹ اوغانستان اٹی سوگو حکومت و پرامن راج اس ٹہیفنگ مریک۔ اوپارے کہ داوخت آ اوغانستان اٹی اسہ پڑک اس ہم داپوزیشن اٹی اف ہرا مچ آ اوغانستان آ حکومت کننگ کے، اگہ اسہ پڑک اس کابل آ کوزہ کیک و تو ایلو اوٹی اڑنگ شاغک توداحالیت اٹ امن مننگ کپک۔ اوپارے کہ نن اوغانستان اٹی امن کن انتس کننگ کینہ، کننگ نا کوشست کننگ اُن، دااسہ مشکل ءُ کاریم اسے۔ اوپارے کہ سپرپاور آک تینا کارروائی تے کرسا کارہ و بھرم ءِ اوفتا ننے کنوئی تمک۔ پاکستان و اوغانستان سپرپاورزآتا کارروائی بھرم تے کنگر۔ چوہدری فواد حسین پارے کہ نن اوغانستان کن اسہ سوگو ءُ آخبت اس جوڑ کننگ نا کوشست کننگ اُن، ننے باور ءِ کہ دا ڈیہہ نا سوگو زرگزرانی آخبت اسہ سوگو ءُ اوغانستان اسے آٹی ءِ۔ ننا غٹ کوشست آک داکنڈآٹی ءُ۔ بنجائی وزیر حوالکاری پارے کہ پاکستان نا آخبت نا زرگزران سوگو اوغانستان آٹے، نن نیامی ایشیائی ریاست آتون سوگو مواصلاتی رابطہ غاتا خواہندار اُن، ہندامسخت کن وزیراعظم عمران خان ازبکستان نا دورہ ءِ کرے۔ اوپارے کہ ازبکستان تون نن پشاور آن مزار شریف و ولدا تاشقند اسکان ریلوائی ٹریک نا معاہدہ غاہم دستخط کرینن۔ نن اوغانستان نا کسر نیامی ایشیائی ریاست آتسکان ٹرک آتا کمک اٹ واپار ءِ مون آ دننگ خوانہ۔ اوپارے کہ گوادر و کراچی پورٹ آتے نیامی ایشیائی ریاست آتسکان رسینگ تننگ نا سیبو سوگو اوغانستان آٹی ءِ انتئے کہ بیرہ سوگو و پرامن اوغانستان آن ہی نیامی ایشیائی ریاست و ڈیہہ ٹی مواصلاتی رابطہ ممکن مننگ کیک۔ بنجائی وزیر حوالکاری پارے کہ اوغان ورناک وزیراعظم عمران خان و چیف آف آرمی اسٹاف تون ہم اوڑدہی کریر واوفتا نکتہ نظر ءِ معلوم کریر، وزیراعظم عمران خان تون اوغانستان نا ورنا و صحافی تا اوڑدہی نا پروگرام پشتو و دری سب ٹائٹل اٹ آن ایئر مس، اومیت ءِ کہ اوغانستان نا زیات تر آبادی ءِ داپروگرام آن پاکستان نا پالیسی نا بارواٹ معلومداری دوئی مریک۔ اوپارے کہ وزیراعظم عمران خان اوغانستان نا ورنا و صحافی تتون اوڑدہی ٹی پاکستان و اوغانستان نا آخبت نا بارواٹ ہیت کرے۔ بنجائی وزیر حوالکاری اوغان ورناتے مخاطب کرسا پارے کہ اسلام آباد اسہ زیبا ءُ شار اسے، اونا بارواٹ چندی کہول آتیا غلط گمانی ودی کننگا، داوڑنا دورہ غاک داوڑنا غلط گمانی تے مر کننگ اٹ کمکار مریرہ۔ اوپارے کہ پاکستان آن سینئر صحافی تا دورہ کابل نا بست وبند ءِ کننگ اُن ہراڑے او اوغان سرکڑدہ غاتون اوڑدہی کیرہ۔ چوہدری فواد حسین پارے کہ ننا یخین ءِ کہ میڈیا اسٹ انگا کسر ءِ ہرانا کمک اٹ نن تینا نکتہ نظر ءِ الس اسکان سرکننگ کینہ۔ اوپاکستان و اوغانستان نا ورناتے اسہ پلیٹ فارم آ یکجا کننگ و پاک اوغان میڈیا کانکلیو نا اڈتننگ آ پاک اوغان یوتھ فورم نا کوشست آتا ستاءِ کرے و ایونٹ نا سرسہب اڈتننگ آ کابل اٹ پاکستان نا سفیر و ایکسٹرنل پبلسٹی ونگ ءِ مبارکبادی تس۔
